घोराही सिमेन्टको नोक्सानी उल्लेख्य घट्यो

News Summary

Generated by OK AI. Editorially reviewed.

घोराही सिमेन्टले चालु आर्थिक वर्षको पहिलो त्रैमासमा नोक्सानी १२ करोड ८० लाख रुपैयाँमा घटाएको छ।
पहिलो त्रैमासमा कम्पनीको बिक्री आम्दानी ९० करोड ६० लाख रुपैयाँ पुगेको छ।
विद्युत् प्राधिकरणको पत्रले कम्पनीमा थप दायित्व सिर्जना हुन सक्ने कम्पनीले जनाएको छ।

२८ कात्तिक, काठमाडौं । घोराही सिमेन्टले नोक्सानी उल्लेख्य घटाएको छ । कम्पनीले चालु आर्थिक वर्षको पहिलो त्रैमासिक वित्तीय विवरण सार्वजनिक गरेको छ । जसअनुसार पहिलो त्रैमासमा कम्पनीको नोक्सानी १२ करोड ८० लाख रुपैयाँ छ । गत आर्थिक वर्षको यसै अवधिमा कम्पनीको नोक्सानी ५१ करोड ३७ लाख रुपैयाँ थियो ।

बिक्री आम्दानी बढ्दा नोक्सानी उल्लेख्य घटेको हो । पहिलो त्रैमासमा कम्पनीको बिक्री आम्दानी ९० करोड ६० लाख रुपैयाँ छ । गत वर्षको यसै अवधिमा यस्तो आम्दानी ६६ करोड ८४ लाख रुपैयाँ थियो ।

४ अर्ब ५६ करोड रुपैयाँ चुक्ता पूँजी रहेको यस कम्पनीको सञ्चित आम्दानी १ अर्ब २८ करोड रुपैयाँ छ । कम्पनी नोक्सानमा रहेसँगै प्रतिसेयर आम्दानी २.८० रुपैयाँ ऋणात्मक छ । त्यस्तै प्रतिसेयर नेटवर्थ १८६ रुपैयाँ ३८ पैसा छ । बिहीबार बजार बन्द हुँदा सेयर मूल्य प्रतिकित्ता ४२५.५० रुपैयाँ छ ।

कम्पनीले यसअघि भएको जेनजी आन्दोलनका कारण उत्पन्न परिस्थितिले व्यापार व्यवसायमा गम्भीर प्रभाव पारेको उल्लेख गरेको छ । त्यस्तै डेडिकेटेड तथा ट्रंकलाइन सम्बन्धी विवाद कायम रहेका बेला असोज २८ गते विद्युत् प्राधिकरणले वक्यौता रकम तिर्न भनेर पत्र पठाएको स्पष्ट पारेको छ । प्राधिकरणको पत्रले थप दायित्व सिर्जना हुन सक्ने कम्पनीले जनाएको छ ।