बालिका बलात्कार आरोपमा जनकपुरधामका मेयर प्रत्यासी साह पक्राउ

News Summary

Generated by OK AI. Editorially reviewed.

जनकपुरधाम उपमहानगरपालिकाका मेयरका प्रत्यासी शिवशंकर साहलाई १४ वर्षीया बालिकामाथि जबरजस्ती करणी गरेको आरोपमा भारतबाट नेपालतर्फ आउँदै गर्दा पक्राउ गरिएको छ।
बलात्कार आरोपमा साहसहित चारजनाविरुद्ध जिल्ला प्रहरी कार्यालय धनुषामा दुईसाता अघि जाहेरी दर्ता भएको थियो र थप दुईजनाको खोजतलास भइरहेको छ।
साह नेकपा एमालेबाट गत २०७९ को चुनावमा मेयरका उम्मेदवार थिए र जनकपुर उद्योग वाणिज्य संघका पूर्वअध्यक्ष समेत हुन्।

२३ मंसिर, जनकपुरधाम । बालिका बलात्कार आरोपमा जनकपुरधाम उपमहानगरपालिकाका मेयरका प्रत्यासी हिरा भनिने शिवशंकर साह पक्राउ परेका छन् ।

एक १४ वर्षीया बालिकालाई होटेलमा जबरजस्ती करणी गरेको आरोपमा साहलगायत चारजनाविरुद्ध दुईसाता अघि जिल्ला प्रहरी कार्यालय धनुषामा जाहेरी दर्ता भएको थियो ।

साहलाई भारतबाट नेपालतर्फ आउँदै गरेको अवस्थामा पक्राउ गरिएको जिल्ला प्रहरी कार्यालय धनुषाका प्रवक्ता एवं डीएसपी गणेश बमले जानकारी दिए । बलात्कार सम्बन्धी उजुरीमाथि अनुसन्धान गर्न उनलाई नियन्त्रणमा लिइएको डीएसपी बमले बताए ।

यसअघि सोही मुद्दामा हिराको नातमा दाई पर्ने मनोज महतोलाई प्रहरीले पक्राउ गरेको थियो । थप दुईजनाको खोजतलास भइरहेको जिल्ला प्रहरी कार्यालय धनुषाले जनाएको छ ।

साह गत २०७९ को चुनावमा जनकपुरधाम उपमहानगरपालिकामा नेकपा एमालेबाट मेयरका उम्मेदवार थिए । उनी निकटतम प्रतिद्वन्दी भएका थिए ।

आगामी चुनावमा उनी मेयर जित्ने प्रवल सम्भावना रहेको अड्कल भइरहेको बेला उनी बलात्कार अभियोगमा मुछिएका छन् । साह जनकपुर उद्योग वाणिज्य संघका पूर्वअध्यक्ष समेत हुन् ।