मादुरो दम्पतीलाई तत्काल रिहा गर्न अमेरिकालाई चीनको आग्रह

News Summary

Generated by OK AI. Editorially reviewed.

चीनले अमेरिकालाई भेनेजुएलाका राष्ट्रपति निकोलस मादुरो र उनकी पत्नीलाई तत्काल रिहा गर्न आग्रह गरेको छ।
चिनियाँ परराष्ट्र मन्त्रालयका प्रवक्ताले अमेरिकाले मादुरो दम्पतीलाई बलपूर्वक नियन्त्रणमा लिएर देशबाहिर लैजानु अन्तर्राष्ट्रिय कानुन उल्लङ्घन भएको बताए।
चीनले भेनेजुएलामा सरकार ढाल्ने प्रयास रोक्न र समस्याहरू संवाद र वार्तामार्फत समाधान गर्न आह्वान गरेको छ।

२० पुस, काठमाडौं । चीनले भेनेजुएलाका राष्ट्रपति निकोलस मादुरो र उनकी पत्नीलाई तत्काल रिहा गर्न अमेरिकासँग आग्रह गरेको छ ।

शनिबार राति अमेरिकाले भेनेजुएलाका राष्ट्रपति मादुरो दम्पतीलाई गिरफ्तार गरेर अमेरिका लगेपछि बेइजिङले रिहा गर्न आग्रह गरेको हो ।

आइतबार चिनियाँ परराष्ट्र मन्त्रालयका एक प्रवक्ताले अमेरिकाले गरेको सैन्य हस्तक्षेपको विभिन्न देशका सरकारले आपत्ति जनाएको खबरबारे प्रतिक्रिया जनाउँदै सो धाराणा राखेका चिनियाँ सरकारी समाचार संस्था सिन्ह्वाले जनाएको छ ।

विदेश मन्त्रालयका प्रवक्ताले अमेरिकाले बलपूर्वक राष्ट्रपति मादुरो र उनकी पत्नीलाई नियन्त्रणमा लिएर देशबाहिर लैजानु अन्तर्राष्ट्रिय कानुन, अन्तर्राष्ट्रिय सम्बन्धका आधारभूत मान्यता तथा संयुक्त राष्ट्रसंघको बडापत्रका उद्देश्य र सिद्धान्तको स्पष्ट उल्लङ्घन भएको बताए ।

चीनले यस घटनाप्रति गम्भीर चासो व्यक्त गरेको उनले बताए । चीनले अमेरिकालाई राष्ट्रपति मादुरो र उनकी पत्नीको व्यक्तिगत सुरक्षाको सुनिश्चितता गर्न र उनीहरूलाई तत्काल रिहा गर्न आग्रह गरेको छ ।

भेनेजुएलामा सरकार ढाल्ने प्रयास रोक्न तथा उत्पन्न समस्याहरू संवाद र वार्तामार्फत् समाधान गर्न चीनको आह्वान छ ।