शहीदको सम्मानमा ३४ जनाले दिए आँखादानको सहमति

News Summary

Generated by OK AI. Editorially reviewed.

शहीद दिवसको अवसरमा ३४ जनाले मृत्युपश्चात आँखादान गर्ने सहमति दिएका छन्।
लायन्स क्लब अफ काठमाडौं माछापोखरी, भिजन सर्कल र पर्वत कुश्माको संयुक्त आयोजनामा १३५ जनाले रक्तदान गरेका छन्।
परोपकार प्रसूति तथा स्त्रीरोग अस्पताल र तिलगंगा आँखा प्रतिष्ठानको प्राविधिक सहयोगमा कार्यक्रम आयोजना गरिएको थियो।

१७ माघ, काठमाडौं । शहीदको सम्मान र सम्झनामा ३४ जनाले मृत्युपश्चात आँखादान गर्ने सहमति दिएका छन् । शहीद दिवसको अवसरमा शुक्रबार विभिन्न संघसंस्थाहरूले आँखादान र रक्तदान गर्दै शहीदहरुप्रति सम्झना र सम्मान व्यक्त गरेका हुन् ।

लायन्स क्लब अफ काठमाडौं माछापोखरी, लायन्स क्लब अफ काठमाडौं भिजन सर्कल र पर्वत कुश्मा समाज गरी तीनवटा संस्थाको संयुक्त आयोजनामा तिलगंगा आँखा अस्पतालमा १३५ जनाले रक्तदान गरेका आयोजकले जनाएको छ ।

त्यसैगरी, ३४ जनाले आफ्नो मृत्युपश्चात आँखा अस्पताललाई दान दिनेगरी तिलगंगा प्रतिष्ठानलाई सहमति दिएका छन् ।

परोपकार प्रसूति तथा स्त्रीरोग अस्पताल थापाथली र तिलगंगा आँखा प्रतिष्ठानको प्राविधिक सहयोगमा आयोजित कार्यक्रममा सहभागीले मुलुकको परिवर्तन र मुक्तिका लागि शहीदहरूको बलिदानीको सम्मान तथा सम्झनास्वरुप गरिएको आँखादान र रक्तदानले नागरिक सेवामा सबैलाई समर्पित बन्न प्रेरणा दिएको बताए ।

जीवित छँदा नै मृत्युपछि आँखादान दिने स्वघोषणाले समाजमा अन्धकारमा बाँचिरहेका दृष्टिविहीनहरूले उज्यालो संसार पाउने तिलगंगा आँखा प्रतिष्ठानका मेन्टिनेन्स विज्ञ परशुराम बरालले बताए ।