‘बिगुल’ को प्रदर्शन बुधबारदेखि स्थगित गर्ने निर्णय

News Summary

Generated by OK AI. Editorially reviewed.

निर्माता कम्पनी म्याग्नोलिया ग्रुप प्रालिले फिल्म 'बिगुल' को प्रदर्शन अर्को सूचना नआएसम्म स्थगित गर्ने निर्णय गरेको छ।
निर्माता दिनेश कोइरालाले निर्वाचनको संवेदनशिल अवस्था र सम्बन्धित निकायको सुझावका कारण प्रदर्शन रोकिएको बताए।
निर्देशक रमेश कोइरालाको फिल्म 'बिगुल' मा बेनिशा हमाल र नरेन खड्काको मुख्य भूमिका रहेको छ।

काठमाडौं । निर्माताले हलमा चलिरहेको फिल्म ‘बिगुल’ को प्रदर्शन स्थगित गर्ने घोषणा गरेका छन् । निर्माता कम्पनी म्याग्नोलिया ग्रुप प्रालिले विज्ञप्ति जारी गर्दै अर्को सूचना प्रकाशित नभएसम्म प्रदर्शन रोक्ने निर्णय गरिएको जनाएको छ ।

बुधबारदेखि अर्को सूचना जारी नभइञ्जेलसम्मको लागि प्रदर्शन हाललाई स्थगित गरिएको विज्ञप्तिमा उल्लेख छ । निर्वाचनको संवेदनशिल अवस्थालाई ध्यानमा राखेर सम्बन्धितको निकायको सुझाव तथा परिस्थितीको मूल्यांकन पश्चात यो निर्णय लिइएको जनाइएको छ ।

नयाँ रिलिज डेट चाँडै घोषणा हुने निर्माता दिनेश कोइरालाले बताए । ‘यसबाट दर्शकवर्ग तथा सम्बन्धित सबैमा पर्न गएको असुविधाप्रति हामी क्षमाप्रार्थी छौं । यस चलचित्रलाई प्रत्यक्ष गएर हेरिदिनुभएका आमदर्शक, कलाकार, प्राविधिक, पत्रकार, अतिथिज्यू सबैलाई हार्दिक धन्यवाद दिन चाहन्छौं’ विज्ञप्तिमा भनिएको छ ।

रमेश कोइराला निर्देशित फिल्म सकारात्मक प्रतिक्रियासहित हलमा चलिरहेको थियो । यो फिल्ममा बेनिशा हमाल र नरेन खड्काको शीर्ष भूमिका थियो ।