हावाहुरीले झापाको व्यवसायीक केराखेतीमा लाखौंको क्षति

News Summary

Generated by OK AI. Editorially reviewed.

झापाको गाउँपालिका क्षेत्रमा हावाहुरीले व्यवसायिक केरा खेतीमा १६ लाख रुपैयाँ बराबरको ठूलो क्षति पुर्‍याएको छ।
किसान चन्द्र बहादुर बस्नेतले राज्यले किसानलाई शतप्रतिशत क्षतिपूर्ति दिनुपर्ने र बीमा नीति गलत भएको बताएका छन्।
उनले भने, 'राज्यले नै बीमा बन्द गरिदिएको थियो' र किसानको मर्म बुझ्ने मन्त्री र नीति निर्माताहरू हुनुपर्ने बताए।

३ चैत, काठमाडौं । हावाहुरीले झापाको व्यवसायिक केरा खेतीमा ठूलो क्षति पुर्‍याएको छ । झापा गाउँपालिकामा केरा खेती गर्दै आएका किसान चन्द्र बहादुर बस्नेतले हावाहुरीबाट ठूलो क्षति भएको बताएका हुन् ।

६ वर्षदेखि व्यवसायिक केरा खेती गर्दै आएका युवा किसान बस्नेतले गत असोज महिनामा बाढीको डुबानबाट पीडित भएका किसानहरुले आइतबारको हावाहुरीले पुनः क्षति व्यहोरेको बताए ।

उनले आफ्नो फार्मममा मात्रै १६ लाख रुपैयाँ बराबरको क्षति भएको बताए । उनका अनुसार मकैमा पनि क्षति पुगेको छ ।

२०८० सालमा नेपालका उत्कृष्ट किसानबाट पुरस्कृत बस्नेतले सरकारले किसानहरुको समस्या सम्बोधन गर्नुपर्ने बताए । उनले भने, ‘किसानहरुलाई पुनः उठ्न र अघि बढ्नका लागि राज्यले शतप्रतिशत क्षतिपूर्ति दिनुपर्छ ।’

उनका अनुसार राज्यले एक वर्ष केरा खेतीको बीमा गरिदिए पनि अर्को वर्षदेखि बीमा हटाइदिएको गुनासो गरे ।

‘राज्यले नै बीमा बन्द गरिदिएको थियो । पहिलो वर्ष बीमा गरिदिने अनि दोस्रो–तेस्रो वर्ष नगरिदिने भनेको किसानलाई फकाएर खेतमा ल्याउने अनि लड्यो भने त्यहीँ सकाइदिने जस्तो भयो,’ उनले भने, ‘राज्यको यो पोलिसी एकदम गलत छ ।’ उनले किसानको मर्म बुझ्ने मन्त्री र नीति निर्माताहरू हुनुपर्ने बताए ।