सुशासनलाई अघि बढाउनेगरी काम गर्छौं : परराष्ट्रमन्त्री खनाल

News Summary

Generated by OK AI. Editorially reviewed.

नवनियुक्त परराष्ट्रमन्त्री शिशिर खनालले सुशासन र आर्थिक समृद्धिलाई अघि बढाउने गरी काम गर्ने बताएका छन्।
मन्त्री खनालले कन्सुलर सेवा विभागका सेवाहरू डिजिटलाइज गर्ने निर्णय गरेको जानकारी दिएका छन्।
उनले मध्यपूर्वको द्वन्द्वका कारण नेपाललाई पर्न सक्ने असरप्रति सजक रहँदै आवश्यक कदम चालिने बताए।

१३ चैत, काठमाडौं । नवनियुक्त परराष्ट्रमन्त्री शिशिर खनालले सुशासन र आर्थिक समृद्धिलाई अघि बढाउनेगरी काम गर्ने बताएका छन् ।

शुक्रबार मन्त्रालयमा पुगेर पदभार ग्रहण गर्दै मन्त्री खनालले सुशासनको पक्षमा, सेवा प्रवाह गर्ने विषयलाई बढी प्राथमिकता दिएर मुलुकलाई अघि बढाउन ध्यान केन्द्रीत गर्ने बताएका हुन् ।

कन्सुलर सेवा विभागबाट दिईने सेवालाई डिजिटलाइज गर्ने निर्णय आफुले गरेको उनले जानकारी दिए । सहज ढंगले प्रविधिमार्फत सरकारी निकायमा नपुगी सेवा प्राप्त गर्न सक्ने गरि व्यवस्था गरिने उनको भनाइ थियो ।

मन्त्री खनालले आर्थिक समृद्धि अन्तर्गत अर्थ कूटनीति, आर्थिक कूटनीतिमा अलि बढी ध्यान जाने पनि बताए ।

परराष्ट्र नीति कस्तो हुने भन्ने बिषय संविधानमा नै स्पष्ट रहेकाले त्यसलाई प्रभावकारी ढंगले अघि बढाउने प्रतिबद्धता उनले जनाए ।

उनले मध्यपूर्वको द्वन्द्वका कारण नेपाललाई पर्न सक्ने असरप्रति सजक रहदै आवश्यक कदम चालिने पनि बताए । साथै, उनले इन्धनको मूल्य र त्यसबाट पर्न सक्ने असरबारे समेत अध्ययन भइरहेको जानकारी दिए ।