अहिलेको सरकार अमेरिकाको कठपुतली हो : मोहनविक्रम सिंह

२१ चैत, काठमाडौं । नेकपा मसालका महामन्त्री मोहनविक्रम सिंहले अहिले बालेन्द्र शाह(बालेन) नेतृत्वको सरकारलाई अमेरिकाको कठपुतली सरकारको भएको टिप्पणी गरेका छन् । शनिबार राष्ट्रिय जनमोर्चाले काठमाडौंमा आयोजना गरेको एक अन्तरक्रिया कार्यक्रममा सिंहले प्रस्तुत गरेको अवधारणापत्रमा बालेन सरकारको परराष्ट्र नीतिमार्फत तमाम प्रश्न र शंका व्यक्त गरिएका छन् ।

‘यो स्पष्ट छ कि अहिलेको नेपाल सरकार अमेरिकाको कठपुतली सरकार हो,’ सिंहको अवधारणापत्रमा भनिएको छ, ‘यसकारण त्यो नेपालको राष्ट्रियता, स्वतन्त्रता र राष्ट्रिय हितका पक्षमा दृढतापूर्वक उभिने, नेपालको तटस्थ परराष्ट्र नीतिलाई इमान्दारितापूर्वक कार्यान्वयन गर्ने, नेपालको राष्ट्रियता वा राष्ट्रिय हितको अतिक्रमण गर्ने देशहरूका विरुद्ध दृढतापर्वक अडान लिने वा विश्वस्तरमा युद्धको विरोध र शान्तिका पक्षमा आवाज उठाउने सम्भावना कमै देखिन्छ ।’

कुनै देशमा वा सरकारमा देशभक्तिको भावनामा कमी देखिए अर्को देशसित राष्ट्रिय हितहरूको सौदावाजी गर्न थाल्ने उनले उल्लेख गरेका छन् । ‘आज देशमा जुन प्रकारको कठपुतली सरकार बनेको छ, त्यसबाट राष्ट्रिय हितमा गम्भीर प्रकारको आँच पुग्ने खतरा नै बढ्दछ,’ सिंहको अवधारणापत्रमा भनिएको छ ।

नेपालमा यसअघिका सत्ताधारी दलले पनि अमेरिकापरस्त नीति नै अपनाउदै आएको सिंहको टिप्पणी छ । एमसीसी पास गरेको विषयका आधारमा त्यो तथ्यमा शंका गर्न नपर्ने उनले बताएका छन् ।

‘तर, उनीहरूले चीनप्रति पनि मैत्रीपूर्ण नीतिहरू अपनाउदै आएका थिए । अर्कातिर, उनीहरूले एक चीनको नीतिलाई समर्थन गरेका थिए र त्यसले गर्दा उनीहरू स्वतन्त्र तिब्बतको पक्षमा थिएनन्,’ उनले लेखेका छन् ।

त्यसैले नै उनीहरूको ‘सत्तालाई उखेलेर नेपालमा आफ्नो कठपुतली सरकार बनाउनुपर्ने आवश्यकता’ अमेरिकालाई रहेको उनले दाबी गरेका छन् ।

जेनजी आन्दोलन लगत्तै बनेको अन्तरिम सरकारलाई दलाई लामाले शुभकामना र अहिले चुनाव पछि बनेको सरकारलाई दलाई लामाका प्रतिनिधिले पठाएको शुभकामनासमेतबाट नेपालका घटनाक्रम अमेरिकाको रणनीतिद्वारा प्रभावित भएको कुरामा कुनै शंका नहरेको उनले दाबी गरेका छन् ।