अन्डाको मूल्य बढ्यो, कति पुग्यो क्रेटको ?

News Summary

Generated by OK AI. Editorially reviewed.

नेपाल लेयर्स कुखुरापालक संघले आइतबारदेखि लागु हुने गरी अन्डाको नयाँ समर्थन बिक्री मूल्य प्रतिक्रेट १५ रुपैयाँले बढाएको छ।
सबैभन्दा ठूलो एक्सएल अन्डाको फार्म मूल्य प्रतिक्रेट ४ सय ७५ रुपैयाँ कायम गरिएको छ, जुन पहिले ४ सय ६० रुपैयाँ थियो।
संघले चितवनलाई आधार मानेर मूल्य निर्धारण गरेको र डिपोमा पुर्‍याउँदा थप १ सय ४५ रुपैयाँ खर्च लाग्ने जनाएको छ।

२२ चैत, काठमाडौं । बजारमा अन्डाको मूल्य पुन: बढेको छ । नेपाल लेयर्स कुखुरापालक संघले आज आइतबारदेखि लागु हुने गरी अन्डाको नयाँ समर्थन बिक्री मूल्य तोकेको हो ।

नयाँ मूल्यसूची अनुसार सबै आकारका अन्डामा प्रतिक्रेट १५ रुपैयाँ वृद्धि भएको छ ।

संघका अनुसार अब सबैभन्दा ठूलो एक्सएल अन्डाको फार्म मूल्य प्रतिक्रेट ४ सय ७५ रुपैयाँ कायम भएको छ, जुन पहिले ४ सय ६० थियो ।

त्यसैगरी ४ सय ३५ रुपैयाँमा बिक्री हुँदै आएको ठूलो अन्डाको मूल्य ४ सय ५० पुगेको छ भने ३ सय ८५ रुपैयाँ रहेको मिडियम अन्डाको मूल्य ४ सय तोकिएको छ ।

संघ सचिव मदन पोखरेलका अनुसार किसानसँगको निरन्तर छलफल र कार्यसमितिको निर्णय बमोजिम बजार स्थिर राख्न र किसानको बढ्दो उत्पादन लागत सुरक्षित गर्न मूल्य समायोजन गर्नुपरेको हो ।

चितवनलाई आधार मानेर निर्धारण गरिएको यो मूल्य फार्मबाट खरिद गर्दाको हो । संघले जारी गरेको सूचनामा चितवनबाट देशका अन्य सहरका डिपोमा अन्डा पुर्‍याउँदा भाडा, कार्टुन र क्रेट खर्चबापत थप १ सय ४५ रुपैयाँ लाग्ने स्पष्ट पारेको छ ।

यो नयाँ मूल्य निर्धारणसँगै अब बजारमा खुद्रा मूल्य पनि बढ्ने निश्चित छ, जसको प्रत्यक्ष असर उपभोक्तामा पर्ने देखिन्छ ।