विपद् व्यवस्थापनका लागि स्रोत-साधन अभाव छ : प्राधिकरण

News Summary

Generated by OK AI. Editorially reviewed.

राष्ट्रिय विपद् जोखिम न्यूनीकरण तथा व्यवस्थापन प्राधिकरणले स्रोत-साधन अभाव रहेको र निजी क्षेत्रसँग सहकार्य गर्नुपर्ने जानकारी गराएको छ।
प्राधिकरणका कार्यकारी प्रमुख दिनेशप्रसाद भट्टले मनसुनजन्य विपद् व्यवस्थापनका लागि हेलिकप्टर, डुंगा, ड्रोन व्यवस्थापनमा निजी क्षेत्रसँग सहकार्य गरिरहेको बताए।
प्राधिकरणले स्थानीय तहलाई खोलानाला अवरुद्ध नहुने गरी सफाइ गर्न पत्राचार गरेको र स्थानीय सरकारले प्रभावकारी विपद् व्यवस्थापन गर्न सक्ने बताए।

१० वैशाख, काठमाडौं । सरकारसँग विपद् व्यवस्थापनका लागि स्रोत-साधनको अभाव रहेको पाइएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले बिहीबार बसेको राष्ट्रिय सभा अन्तर्गतको संघीयता सवलीकरण तथा राष्ट्रिय सरोकार समितिको बैठकमा सो कुराको जानकारी गराएको हो ।

प्राधिकरणका कार्यकारी प्रमुख इन्जिनियर दिनेशप्रसाद भट्टले त्यस्ता खालको अभाव हुन नदिनका लागि आफूहरूले निजी क्षेत्रसँगको सहकार्यमा जोड दिनुपरेको समेत स्पष्ट पारे ।

मनसुनजन्य विपद् व्यवस्थापनका लागि हवाई उद्धारका लागि आवश्यक पर्ने हेलिकप्टर, डुंगा, ड्रोन लगायतका व्यवस्थापन गर्नका लागि निजी क्षेत्रसँग सहकार्य गर्नु परेको प्राधिकरणले जनाएको छ ।

प्राधिकरणका कार्यकारी प्रमुख भट्टले गत वर्षमा जस्तै यस वर्ष पनि विपद् व्यवस्थापनका लागि अभाव भएका स्रोत-साधनको थप व्यवस्थापनका लागि निजी क्षेत्रसँगको सहकार्यमा जोड दिइएको बताए ।

प्राधिकरणले विपद् व्यवस्थापनको कामलाई प्रभावकारी बनाउनका लागि स्थानीय तहलाई ढल तथा खोलानाला अवरुद्ध नहुने गरी सफाइको काम गर्न पनि पत्राचार गरिएको जनाएको छ ।

विपद् व्यवस्थापनको काम स्थानीय सरकारले प्रभावकारी ढंगले सम्पन्न गर्न सक्ने भएकाले सोही अनुसारको तयारी भइरहेको प्राधिकरणका कार्यकारी प्रमुख भट्टले बताए ।