निर्यातजन्य उद्योग व्यवसायसँग सम्बन्धित समस्या समाधान गर्ने प्रधानमन्त्रीको प्रतिबद्धता

News Summary

Generated by OK AI. Editorially reviewed.

प्रधानमन्त्री बालेन शाहले निर्यातजन्य उद्योगका समस्या समाधान गर्न नीतिगत सुधार गर्ने प्रतिबद्धता जनाउनुभएको छ।
उद्योगीहरूले कच्चा पदार्थको सहज उपलब्धता र गलैंचा निर्यातमा देखिएको प्रविधिगत समस्याबारे प्रधानमन्त्रीलाई जानकारी गराएका छन्।
प्रधानमन्त्रीले सम्बन्धित निकायलाई काठ निर्यातको कार्यविधि तुरुन्त बनाउन र निर्यातका चुनौती तत्काल सम्बोधन गर्न निर्देशन दिनुभएको छ।

८ साउन, काठमाडौं । प्रधानमन्त्री बालेन शाहले नेपालका प्रमुख निर्यातजन्य उद्योग व्यवसायसँग सम्बन्धित समस्याहरू समाधान गर्ने प्रतिबद्धता जनाएका छन् ।

शुक्रबार सिंहदरबारमा निर्यातजन्य उद्योग व्यवसायसँग आबद्ध प्रतिनिधिहरूसँग छलफल गर्दै प्रधानमन्त्री शाहले निर्यात प्रवर्द्धनका चुनौतीका बारेमा जानकारी लिदै नीतिगत सुधार तथा समाधानमा सरकारले ध्यान दिने बताएका हुन् ।

छलफलका क्रममा प्रधानमन्त्री शाहले निर्यातजन्य उद्योग व्यवसायमा विद्यमान समस्याका बारेमा जानकारी लिनुभएको नेपाल प्लाइउड उत्पादक सङ्घका अध्यक्ष एवं उद्योग वाणिज्य महासंघ निर्यात समितिका सभापति होमप्रसाद घिमिरे जानकारी दिए ।

‘कच्चा पदार्थको सहज उपलब्धता, गुणस्तर मापदण्डहरूबीचको समकक्षताकायम गर्ने विषय तथा अन्य समस्याहरूबारे जानकारी गराएका छौं,’ उनले भने ।

प्रधानमन्त्रीले आफ्नो सचिवालयमार्फत सम्बन्धित निकायहरूलाई तत्काल गर्न सकिने कामहरू अघि बढाउन निर्देशन दिएको उनले बताए ।

त्यस्तै प्लाइवुडका ढोका, काठनिर्यातका लागि आवश्यक कार्यविधि तुरुन्त बनाएर काम अघि बढाउन निर्देशन दिनुभएको अध्यक्ष घिमिरेले जानकारी दिए ।

त्यस्तै छलफलमा सहभागी नेपाल गलैंचा उत्पादक तथा निर्यातकर्ता सङ्घका अध्यक्ष बलराम गुरुङले अमेरिका निर्यातमा देखिएको समस्याका बारेमा प्रधानमन्त्रीलाई अवगत गराइएको बताए ।

उपभोक्ता सुरक्षा प्रमाणीकरण परीक्षण गर्ने प्रविधि नेपालमा नभएकाले गलैंचा निर्यातमा समस्या भएको उनले बताए ।

जवाफमा प्रधानमन्त्रीले सम्बन्धित निकायलाई फोन गरेर समस्या समाधानका लागि निर्देशन दिनुभएको अध्यक्ष गुरुङले बताए ।