बागमती प्रदेशमा एमाले, नेकपा र राप्रपाबीच मन्त्रालयको भागबण्डा टुंगियो

३ भदौ, हेटौंडा । बागमती प्रदेशमा करिब एक वर्षदेखि रिक्त सभामुखसहित ७ वटा मन्त्रालयको भागबण्डा टुंगिएको छ ।

बुधबार नेकपा एमाले, नेपाली कम्युनिस्ट पार्टी (नेकपा) र राप्रपाबीच नयाँ सरकार गठनका लागि ६३ जना बहुमत सांसदको समर्थनसहित दाबी पेस भएसँगै मन्त्रालयको भागबण्डा पनि टुंगो लगाइएको एमाले सांसद आनन्दकुमार श्रेष्ठले जानकारी दिए ।

भागबण्डाको सहमतिअनुसार नै बागमतीको सातौं मुख्यमन्त्रीको रूपमा भक्तपुरका किरण थापामगरले दाबी पेस गरेका छन् । यहाँ मुख्यमन्त्रीबाहेक ७ वटा मन्त्रालय कायम छन् ।

श्रेष्ठका अनुसार एमालेले मुख्यमन्त्रीसहित २ वटा मन्त्रालय, नेकपाले सभामुख र २ वटा मन्त्रालय तथा राप्रपाले ३ वटा मन्त्रालय लिने सहमति भएको छ ।

यो पनि पढ्नुहोस

बागमती सरकारबारे राप्रपामा किचलो

सत्ता साझेदार तीन दलीय सहमतिअनुसार एमालेले मुख्यमन्त्रीसहित भौतिक पूर्वाधार तथा विकास मन्त्रालय र आन्तरिक मामिला, कानुन तथा सहकारी मन्त्रालय लिने भएको छ ।

नेकपाले आर्थिक मामिला तथा योजना र खानेपानी ऊर्जा तथा सिँचाइ मन्त्रालय पाउने सहमति जुटेको छ ।

यस्तै, राप्रपाले स्वास्थ्य तथा सामाजिक विकास मन्त्रालय, कृषि, पशुपन्छी, वन तथा वातावरण मन्त्रालय र उद्योग, पर्यटन, श्रम तथा यातायात मन्त्रालय पाउने सहमति भएको सांसद श्रेष्ठले जानकारी दिए ।

सहमतिअनुसार नेकपाले अब सभामुख पाउने भएको छ ।

राप्रपालाई सभामुखसहित २ वटा मन्त्रालय लिन प्रस्ताव गरिएपनि अन्तिममा ३ वटा मन्त्रालयमा सहमति जुटेको बताइएको छ ।

यसअघि राप्रपाबाट सभामुख बनेका भुवनकुमार पाठकले गत भदौको जेनजी आन्दोलनपछि सभामुख पदबाट राजीनामा दिएका थिए । त्यसयता सभामुख पद रिक्त छ ।

हाल उपसभामुख अप्सरा चापागाईंले प्रदेशसभा सञ्चालन गर्दै आएकी छन् । उपसभामुखमा भने चापागाईंले नै निरन्तरता पाउने सहमति भएको छ ।