३० सेकेन्डसम्मको भिडियो बनाउने नयाँ एआई मोडल अलिबाबाले ग‍र्‍यो सार्वजनिक

९ भदौ, काठमाडौं । चिनियाँ प्रविधि कम्पनी अलिबाबाले आफ्नो नयाँ एआई भिडियो बनाउने मोडल ‘वान थ्री प्वाइन्ट जिरो’ सार्वजनिक गरेको छ । कम्पनीले एआईसम्बन्धी खर्च बढाइरहेका बेला थप लगानी जुटाउन १० अर्ब अमेरिकी डलर बराबरको सेयर बिक्री गरेको एक दिनपछि यो नयाँ मोडल सार्वजनिक गरेको हो ।

‘वान थ्री प्वाइन्ट जिरो’ ले कागजात, स्प्रेडसिट, स्लाइड र वेबपेजबाट ३० सेकेन्डसम्मको भिडियो बनाउन सक्छ । प्रयोगकर्ताले सामग्री दिएपछि एआईले त्यसलाई बुझेर छोटो भिडियो तयार गर्न सक्ने अलिबाबा क्लाउडले चिनियाँ सामाजिक सञ्जाल विच्याटमा जनाएको छ ।

अलिबाबाका अनुसार यस मोडलको सार्वजनिक परीक्षण संस्करण अगस्ट ६ मा सार्वजनिक गरिएको थियो । त्यसयता यसको प्रयोग छोटा नाटक, फिल्म निर्माण, विज्ञापन, प्रचार, पर्यटनसम्बन्धी सामग्री र म्युजिक भिडियो बनाउन भइरहेको छ ।

अलिबाबाले आफ्नो नयाँ एआई मोडल विश्वव्यापी रूपमा तीव्र बन्दै गएको एआई प्रतिस्पर्धालाई ध्यानमा राखेर सार्वजनिक गरेको हो । ठूला प्रविधि कम्पनीहरूले एआई क्षेत्रमा ठूलो लगानी गरिरहेका बेला अलिबाबाले पनि आफ्नो एआई क्षमता विस्तार गर्न खोजिरहेको छ ।

कम्पनीले एआई क्षेत्रमा खर्च बढाइरहेका कारण पछिल्लो त्रैमासिकमा उसको आम्दानीमा ठूलो असर परेको छ । अलिबाबाको त्रैमासिक नाफा अघिल्लो वर्षको सोही अवधिको तुलनामा ७५ प्रतिशतले घटेको रोयटर्सले जनाएको छ ।

एआई क्षेत्रमा थप लगानी गर्न अलिबाबाले गरेको १० अर्ब अमेरिकी डलरको सेयर बिक्री, हङकङमा सूचीकृत कुनै कम्पनीले गरेको अहिलेसम्मकै सबैभन्दा ठूलो प्राथमिक बजारमा थप सेयर निष्कासन भएको बताइएको छ ।

यसबाट प्राप्त रकम एआई प्रविधिको विकास र अन्य प्रविधिसम्बन्धी काममा खर्च गर्ने कम्पनीको योजना छ ।