मन्त्रीका अघि राज्य झुकेको उदाहरण भन्दै रास्वपा सांसद यज्ञमणिले सम्झिए पूर्वमन्त्रीहरू

३१ भदौ, काठमाडौं । मन्त्रीका अगाडि राज्य झुकेको उदाहरण भन्दै सत्तारुढ दल राष्ट्रिय स्वतन्त्र पार्टीका रास्वपा सांसद यज्ञमणि न्यौपानेले केही पूर्वमन्त्रीहरूलाई सम्झिएका छन् ।

प्रतिनिधिसभामा बालबालिका सम्बन्धी विधेयक २०८३ माथि विचार गरियोस् भन्ने प्रस्तावमाथिको छलफलमा उनले पूर्वमन्त्रीहरू सम्झिएका हुन् ।

‘म स्मरण गर्छु, पूर्वकानुनमन्त्री तथा सांसद लिलानाथ श्रेष्ठ  । जसले ११ वर्षीय बालिका घरमा कामदारको रुपमा राखेको र डब्लु नाम गरेको कुकुरसँग रात बिताएर सुत्नुपर्ने पीडा भोगिएको समाचार सार्वजनिक भएका थिए,’ उनले भने ।

त्यसबेला मन्त्रीसँग राज्य झुकेको उनको भनाइ छ ।

‘राज्यले कानुन कार्यान्वयन गरेन । ती बालिका कुकुरसँग सुत्नु पर्ने पीडा यत्रतत्र सर्वत्र सञ्चारमाध्यममा आए । तर राज्य निरीह भयो कानुन मन्त्रीका अगाडि राज्य झुक्यो । कारबाही गरेन,’ न्यौपानेले भने, ‘त्यसैले कानुनमा के व्यवस्था गरिन्छ भन्ने मूल कुरा होइन । लेखिएका कुरा कार्यान्वयन गर्न सक्ने किसिमको कानुन निर्माण गर्दै छौं कि छैनौं हेर्नुपर्छ ।’

यस्ता उदाहरण अरु पनि रहेको भन्दै उनले पूर्वसांसद रेखा कुमारी शर्मालाई सम्झिए ।

‘म दोस्रो पनि स्मरण गर्छु । सांसद रेखा कुमारी शर्मा ठूलै तहल्का मचियो  । अदालत लानेसम्मको कुरा भयो तर अन्तत मुद्दा फिर्ता लियो  । कहाँ छन् यी दुइटा मैले नाम उल्लेख गरेका बालिकाहरूको अस्तित्व ? आज राज्यले खोज्या छ कि छैन ?,’ न्यौपानेले प्रश्न गरे ।

ऐन संशोधनको क्रममा बालबालिकाहरूलाई घरका काममा लगाइए आफ्ना बालबालिका जस्तै व्यवहार गर्नुपर्ने विषय आएको बताए । पालेको बच्चालाई पनि आफ्नै बच्चाको जस्तै संरक्षण गर्नु पर्ने कानुन रहेको भन्दै उनले यसको व्यवहारिक कार्यान्वयन हुनुपर्ने बताए ।

घरमा काम गर्ने बालबालिकाहरू स्कुल जानसक्ने अवस्था नरहेको र भाँडा माझेर बस्नुपर्ने स्थिति रहेको बताए ।

यहाँनेर उनले भनेका छन्, ‘कानुन कार्यान्वयनको सन्दर्भमा राज्यले उपयुक्त व्यवस्था गरोस् । मनिटरिङ गरोस् र कुन कुन ठाउँमा कस्ता–कस्ता बालबालिकाहरू शोषित छन् पत्ता लगाओस्’ उनले भने ‘सक्षम र योग्य परिवारले नै शोषित गर्ने कुराहरू हुन्छन् । त्यसैले कानुन कार्यान्वयनको सन्दर्भमा राज्यले ध्यान दिओस् ।’