गागन खोलामा अवैध उत्खनन्‌मा संलग्न ६ टिपर र १ डोजर नियन्त्रणमा

२२ असोज, सिरहा । सिरहाको गोलबजारस्थित बल्डाराबाट अवैध रूपमा नदीजन्य पदार्थ उत्खनन् गरिरहेको अवस्थामा सशस्त्र प्रहरीले ६ थान टिपर र एक थान जेसिबी नियन्त्रणमा लिएको छ ।

अवैध उत्खनन् भइरहेको सूचनाका आधारमा सशस्त्र प्रहरी बल गोलबजारबाट खटिएको टोलीले ती सवारीसाधन नियन्त्रणमा लिएको हो।

नियन्त्रणमा लिइएका सवारीसाधनमा प्रदेश २–०१–००१ क ०१७०, प्रदेश १–००१ क ०२८५, को १ ख ४९७५, भे १ क ९५० र प्रदेश ३–००१ क ३३७५ नम्बरका टिपरसहित एक थान जेसिबी रहेका छन् ।

गोलबजार नगरपालिकाले गागन खोलाको ठेक्का लगाए पनि खोला तथा खोला आसपासका वन क्षेत्र, निजी जग्गा र ऐलानी जग्गासमेतमा मौका छोपेर मापदण्डविपरीत उत्खनन् हुने गरेको स्थानीयको गुनासो छ ।

सशस्त्र प्रहरीका एसपी सुमनजंग थापाले सवारीसाधन नियन्त्रणमा लिए पनि चालकहरू फरार भएको बताए ।

चालकहरू फरार रहेकाले नियन्त्रणमा लिइएका सवारीसाधन कार्यालयसम्म ल्याउन केही कठिनाइ भइरहेको उनले बताए ।

नगरपालिकासँगको समन्वयमा सवारीसाधन ल्याएर आवश्यक कारबाहीका लागि नगरपालिकालाई जिम्मा लगाइने एसपी थापाले बताए ।

उनका अनुसार व्यक्तिको निजी जग्गाबाट उत्खनन् गरिएको भए पनि नगरपालिकाबाट आवश्यक अनुमति नलिएको प्रारम्भिक रूपमा देखिएको छ ।

गोलबजार नगरपालिकाका प्रमुख प्रशासकीय अधिकृत रुनारायण खतिवडाले अवैध उत्खनन्को विषयमा नगरपालिकाको गम्भीर ध्यानाकर्षण भएको बताए ।

‘हाम्रै नगर प्रहरी र सुरक्षा निकायको सहयोगमा अवैध उत्खनन् गर्ने सवारीसाधन नियन्त्रणमा लिएका हौँ । अब अवैध उत्खनन् रोक्न सुरक्षा निकायसँग पनि छलफल गरिरहेका छौँ । अवैध उत्खनन् रोकिन्छ,’ उनले भने ।

जिल्ला प्रशासन कार्यालय सिरहाका प्रमुख जिल्ला अधिकारी शान्तिराज प्रसाईंले अवैध उत्खनन्को सूचना प्राप्त हुनासाथ प्रहरी खटाएर नियन्त्रणमा लिन लगाउने बताए ।