‘चौथो तिहार फ्लोरा एक्स्पो’ १७ कात्तिकमा, १ करोड कारोबार अपेक्षा

१३ कात्तिक, काठमाडौं । नजिकिँदै गरेको तिहार लक्षित गर्दै काठमाडौं भृकुटीमण्डपमा ‘चौथो तिहार फ्लोरा एक्स्पो–२०८३’ हुने भएको छ ।

नर्सरी व्यवसायी संघ नेपालको आयोजनामा १७ देखि २१ कात्तिकसम्म पाँच दिने राष्ट्रियस्तरको पुष्प प्रदर्शनी तथा मेला हुन लागेको हो ।

स्वदेशी उत्पादनलाई बढावा दिने र नर्सरीजन्य वस्तुको परनिर्भरता कम गर्ने उद्देश्यसाथ यस वर्ष ‘तिहारको उत्सव, स्वदेशी फूलको महोत्सव’ भन्ने मूल नारा तय गरिएको छ ।

मेला संयोजक तथा नर्सरी व्यवसायी संघ नेपालकी उपाध्यक्ष लक्ष्मी महर्जनका अनुसार एक्स्पोमा विभिन्न प्रजातिका फूल फुल्ने तथा नफुल्ने आलङ्कारिक बिरुवा, कृषि, वन, जडीबुटी र फलफूल नर्सरीबाट उत्पादित बोटबिरुवा प्रदर्शनी तथा बिक्री वितरणका लागि राखिने छ ।

यसका साथै मलखाद, अर्गानिक एवं रासायनिक विषादी, बिउबिजन, औजार, उपकरण र प्रविधिका स्टलसमेत रहनेछन् ।

७३ स्टल रहने, ३५ हजारले अवलोकन गर्ने

मेलामा ६३ वटा व्यावसायिक स्टल, वनस्पति विभाग र पुष्प विकास केन्द्रसहित ६ वटा अफिसियल स्टल र प्रतिस्पर्धाका ४ वटा स्टल गरी कुल ७३ स्टल रहने आयोजकले जनाएको छ ।

मेलालाई करिब ३५ हजार दर्शकले अवलोकन गर्ने र १ करोड रुपैयाँभन्दा बढीको आर्थिक कारोबार हुने अपेक्षा गरिएको छ ।

मेला अवलोकन गर्न सर्वसाधारणका लागि प्रतिव्यक्ति १ सय रुपैयाँ तथा विद्यार्थी र ज्येष्ठ नागरिकका लागि ५० रुपैयाँ प्रवेश शुल्क तोकिएको छ ।

मेलामा सहभागी व्यवसायीको क्षमता विकास र हौसला बढाउन स्वच्छ प्रतिस्पर्धा गराइ उत्कृष्टलाई शिल्ड, नगद तथा प्रमाणपत्रद्वारा पुरस्कृत गरिने छ ।

प्रतिस्पर्धाको मूल्यांकन गर्न कृषि बागवानी विज्ञ, वनस्पति विज्ञ र पुष्प विकास केन्द्रका प्रमुख सहित ३ सदस्यीय समिति गठन गरिएको छ ।

यस एक्स्पोको प्रवर्द्धकमा वनस्पति विभाग र जडीबुटी उत्पादन तथा प्रशोधन कम्पनी लिमिटेड छन् । त्यसैगरी बागमती प्रदेश सरकार (कृषि, पशुपन्छी, वन तथा वातावरण मन्त्रालय), कृषि विभाग, पुष्प विकास केन्द्र र राष्ट्रिय फलफूल विकास केन्द्र सहआयोजकका रूपमा छन् ।

मेलालाई सेवा म्यानुफ्याक्चरिङ, ग्रिस्मा नर्सरी, उदय गार्डेन, सलोभ एग्रिकल्चर, कुमारी एग्रो र फ्लोरिकल्चर सहकारी लिमिटेड लगायतले विशेष सहयोग गरेका छन् ।

देशमा विद्यमान राजनीतिक अस्थिरता र आर्थिक मन्दीका कारण खस्किएको उद्यमी–व्यवसायीको मनोबल बढाउन र कृषि क्षेत्रमा लगानी गरी रोजगारी सिर्जना गर्नेतर्फ नयाँ पुस्ता आकर्षित गर्न यस मेलाले महत्त्वपूर्ण भूमिका खेल्ने विश्वास आयोजकले लिएको छ ।