सुहानाको नयाँ भिडियोमा शाहरुख खानको रमाइलो टिप्पणी

बलिउड अभिनेता शाहरुख खानकी छोरी सुहाना यतिबेला चर्चामा छिन् । उनले आफ्नो इन्स्टाग्राममा सार्वजनिक गरेको एउटा ट्रान्जिसन भिडियो भाइरल भइरहेको छ । उक्त भिडियोमा सुहानाले बुबा शाहरुखको आगामी फिल्म ‘किङ’ को गीतमा लिपसिङ गर्दै आफ्नो रूप परिवर्तन गरेकी छिन् । छोरीको यो शैली देखेर शाहरुखसमेत छक्क परेका छन् । उनले सुहानाको पोस्टमा रमाइलो टिप्पणी गर्दै माया व्यक्त गरेका छन् ।

सुहानाले आफ्नो नयाँ भिडियोमा फिल्म ‘किङ’ को गीत ‘तू मिल जाए’ प्रयोग गरेकी छिन् । भिडियोमा उनी सुरुवातमा सामान्य घरेलु पहिरनमा देखिन्छिन् । त्यसपछि एकैछिनमा पार्टी लुकमा प्रस्तुत हुन्छिन् । उनको पहिरनसँगै अनुहारको हाउभाउ र गीतको तालमेलले दर्शकको ध्यान खिचेको छ ।

विशेषगरी बेलायती गायक एड शिरनले तीव्र गतिमा गाएको अंग्रेजी र्‍यापलाई सुहानाले सहज रूपमा लिपसिङ गरेकी छिन् । उनको यही शैलीलाई सामाजिक सञ्जाल प्रयोगकर्ताले मन पराएका छन् । धेरैले उनको आकर्षक र ग्ल्यामरस रूपको प्रशंसा गरेका छन् ।

शाहरुखको रमाइलो टिप्पणी

छोरीको भिडियो देखेपछि शाहरुखले पनि प्रतिक्रिया दिनबाट आफूलाई रोक्न सकेनन् । उनले सुहानाको पोस्टमा टिप्पणी गर्दै लेखेका छन्, ‘तिमी यति कठिन गीतका शब्द कसरी सजिलै याद राख्न सक्छ्यौ ? मेरो बसको कुरा थिएन । किनभने एड शिरन निकै छिटो गाउँछन् ।’

शाहरुखको यो टिप्पणीले बुबा–छोरीबीचको आत्मीय सम्बन्ध झल्काउँछ । उनको रमाइलो प्रतिक्रियालाई सामाजिक सञ्जाल प्रयोगकर्ताले पनि मन पराएका छन् ।

साथीहरूबाट पनि प्रशंसा

सुहानाकी मिल्ने साथी अनन्या पाण्डेले पनि उनको भिडियोमा प्रतिक्रिया दिएकी छिन् । उनले लेखेकी छिन्, ‘मैले आफ्नो जीवनमा यति प्यारो कुरा यसअघि कहिल्यै देखेकी थिइनँ ।’

त्यस्तै, बलिउडका चर्चित ओरीले पनि रमाइलो गर्दै ‘ल, अन्ततः एउटा रिल त आयो’ भन्दै टिप्पणी गरेका छन् ।

आईएएनएसको रिपोर्टअनुसार सुहानाको यो नयाँ भिडियोमा लाखौँ लाइक आइसकेका छन् । प्रशंसक र कलाकारहरूले उनको पोस्टमा प्रशंसासहितका प्रतिक्रिया दिइरहेका छन् ।

फिल्म ‘किङ’ को पहिलो गीत ‘तू मिल जाए’ नोभेम्बर २ मा शाहरुख खानको ६१औँ जन्मदिनको अवसर पारेर सार्वजनिक गरिएको थियो । गीतको भिडियोमा शाहरुखसँगै अभिनेत्री दीपिका पादुकोण पनि देखिएकी छिन् ।

गीतमा अरिजित सिंह, एड शिरन र मधुबन्ती बाग्चीले स्वर दिएका छन् । सचिन–जिगरको जोडीले संगीत तयार पारेको गीतका शब्द कुमारले लेखेका हुन् । गीतमा रहेको अंग्रेजी र्‍याप भने एड शिरनले गाएका छन् ।

सिद्धार्थ आनन्दको निर्देशनमा बनेको फिल्म ‘किङ’ मा शाहरुख खान मुख्य भूमिकामा छन् । फिल्म आगामी डिसेम्बर २४ मा विश्वभरका सिनेमा हलमा प्रदर्शन हुने तयारीमा छ ।