इजिप्ट भ्रमणबाट फर्किए उपप्रधानमन्त्री सिंह

२४ कात्तिक, काठमाडौं । उपप्रधानमन्त्री एवं शहरी विकास मन्त्री प्रकाशमान सिंहले नेपालले शहरीकरणमा भोगिरहेको समस्याबारे विश्व समुदायको ध्यानाकर्षण गराएको बताएका छन् ।

इजिप्टको कायरोमा सम्पन्न वर्ल्ड अर्बान फोरममा सहभागी भएर नेपाल फर्कने क्रममा त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै उपप्रधानमन्त्री सिंहले भ्रमण उपलब्धीमूलक भएको बताएका हुन् ।

शहरी विकासका क्षेत्रमा भइरहेको कामबाट नेपालसँग सहकार्य गरिररहेका एजेन्सीले सन्तोग मानेको पनि उनले बताए । आगामी दिनमा शहरीकरणका काम प्रविधियुक्त र थप प्रभावकारी हुने उपप्रधानमन्त्री सिंहको भनाइ छ ।

उनले कायरोमा सम्पन्न फोरममा नेपालले शहरीकरणको क्षेत्रमा हासिल गरेको प्रगति र भोगिरहेको समस्याबारे विश्वकै ध्यानाकर्षण गराउन सफल भएको पनि दाबी गरे ।

‘जलवायु परिवर्तनले गर्दा शहररुहरुमा अतिवृष्टि हुने, बाढी आउने, हिमालहरुमा हिमपहिरो आउँदा विपदका घटना हुने गरेको छ । तर, नेपाल यस्तो देश हो विश्वमा, जसले प्रदुषण कम गर्छ तर जलवायु परिवर्तनको असर भने धेरै खेप्नुपरिररहेको छ’, उनले भने, ‘ग्रिन फाइनान्सिङको कुरामा युनएन ह्याबिट्याटले संयुक्त राष्ट्रसंघसँग कुरा गरेर नेपाललाई सहयोग पुर्‍याउनुपर्ने कुरालाई मैले उठाएको छु ।’

वर्ल्ड अर्बान फोरममा नेपालले आफ्ना विषयहरु विश्व मञ्चमा जोडदार रुपमा उठाएको र भ्रमण फलदायी भएको उनले बताए ।