प्रधानमन्त्री ओलीको निर्वाचन क्षेत्रमा १७ वर्षपछि बन्यो पुल

२९ माघ, विराटनगर। हुलाकी राजमार्ग अन्तर्गत रतुवा खोलामा पुल निर्माण भएको छ । यो पुलले झापा र मोरङको दक्षिणी क्षेत्रलाई जोड्छ । हुलाकी राजमार्ग निर्देशनालय योजना कार्यालय इटहरीका अनुसार निर्माण सुरु भएको १७ वर्षपछि पुल तयार भएको हो ।

पुल निर्माण भएको स्थान झापातर्फ प्रधानमन्त्री तथा नेकपा एमाले अध्यक्ष केपी शर्मा ओलीको निर्वाचन क्षेत्र गौरीगञ्जमा (झापा क्षेत्र नम्बर-५) मा पर्छ भने मोरङतर्फ सार्वजनिक लेखा समिति सभापति ऋषिकेश पोखरेलको क्षेत्र (मोरङ क्षेत्र नम्बर २) पर्छ ।

पुल निर्माणको काम पूरा भएपनि आसपासको सडक कालोपत्रेको काम बाँकी छ । निर्माण सम्पन्नको समयसमीमा असारसम्मको छ । समय अगाडि नै निर्माण पूरा हुने हुलाकी राजमार्ग योजना कार्यालय इटहरीका प्रमुख युवराज पोखरेलले बताए ।

उनका अनुसार  उक्त पुलको निर्माण  वि.स.२०६४/६५ मा सुरु भएको थियो । तर, बीचमा अधुरै भएपछि दोस्रो पटक निर्माणका लागि २०७९ सालमा ठेक्का लागेको थियो ।

पुल नहुँदा स्थानीयबासी वर्खामा डुङ्गा र हिउँदमा बासको पुलबाट यात्रा गर्न बाध्य थिए । यात्रुले साइकलमा बासको पुलबाट खोला वारपार गर्दा १० रुपैयाँ र मोटरसाइकलको २० रुपैयाँ तिर्नपर्थ्यो।

पुल निर्माण भएपछि आवतजावत सहज भएको छ । ‘पुल निर्माण भएपछि सवारी आवागमान भइरहेका छन्,’ पोखरेलले भने,‘पुलको पूर्व पश्चिमको सडक निर्माण भइरहेको छ।’

मोरङ–सुनसरी पुल आयोजनाले आर्थिक वर्ष २०६४–६५ मा कालिका–ओसिए जेभीले १० करोड ३२ लाख ठेक्का पाएको थियो । त्यसबेला २०४.८ मिटर मात्रै पुल निर्माण भयो । अधुरै रहेको पुल खोलाको बीच भागमा थियो।

हुलाकी राजमार्ग कार्यालयका अनुसार ७६.३ मिटर थप पुलको संरचना निर्माणाका लागि देव एन्ड सायर/समता/आशिषदीप जेभीसँग २०७९ साल पुस १७ गते २२ करोड १२ लाख रुपैयाँमा ठेक्का सम्झौता भएको थियो ।

त्यसपछि मोरङ तर्फ ५० मिटर र झापा तर्फ २६ मिटर पुलको लम्बाई थपिएको छ । निर्माण सम्पन्न भएपछि पुलको लम्बाई २८२.५ मिटरको छ ।

रतुवा खोलाको अधुरो पुल निर्माण भएपछि झापाका दक्षिण क्षेत्रका सर्वसाधारणलाई हुलाकी मार्ग हुँदै कोशी प्रदेशको राजधानी विराटनगर आउ– जाउ गर्न सहज भएको छ ।
तत्कालिन ठेकेदार कम्पनीले पुल अधुरै छाडेपछि १५ वर्षपछि सोही पुलका लागि नयाँ ठेक्का लागेको थियो ।

पुलको सुरक्षाका लागि झापातर्फ ६ सय ५० र मोरङतर्फ १४ सय मिटरको तटबन्ध पनि निर्माण भइरहेको छ ।