एमालेले सत्ता सहयात्री हुनुको सामान्य शिष्टाचार पनि देखाएन : विमलेन्द्र निधि

४ वैशाख, काठमाडौं । नेपाली कांग्रेसका पूर्व उपसभापति विमलेन्द्र निधिले सत्ता सहयात्री शक्ति हुनुको शिष्टाचार नेकपा एमालेले नदेखाएको बताएका छन् ।

बिहीबार बिहान बसेको पदाधिकारी एवं पूर्व पदाधिकारीको बैठकमा निधिले जनकपुरको प्रसंग उठाउँदै एमाले नेताहरुको व्यवहारबारे टिप्पणी गरेका हुन् । ‘एमालेसँग सत्ता सहयात्राबारे कुराकानी भइरहेको छ । म मेरो जनकपुरको कुरा गर्छु’ निधिले भनेका थिए, ‘जनकपुरमा एमालेले सत्ता सहयात्री हुनुको सामान्य शिष्टाचार पनि देखाएको छैन ।’

कांग्रेसका पुराना नेता रामनारायण मिश्रको स्मृतिमा बनाउन लागिएको भवन निर्माणमा एमालेले अवरोध गरिरहेको निधिले बताएका थिए । मिश्रको सम्झनामा प्रदेश सरकारले भवन निर्माण कार्य अगाडि बढाएको छ ।

‘बीपी कोइरालाका पालाका नेताको सम्झनामा भवन बनाउने भनेर भूमि पुजन सकेर हामी फर्कियौं । एमालेले त्यहाँ आएर तोडफोड गर्‍यो’, निधिले पार्टी नेतृत्वको ध्यान आकर्षित गराएका थिए ।
रामनारायण मिश्र जतिको नेताको स्मृतिमा भवन बनाउन रोक लगाइनु राजनीतिक सहिष्णुता समेत नभएको निधिको तर्क थियो ।