सांसद माया राईको बयान- सहकारीका निर्णयमा गरिएको हस्ताक्षर मेरै हो

३० वैशाख, काठमाडौं । कालिमाटीमा रहेको स्वर्णलक्ष्मी सहकारी ठगी प्रकरणमा पक्राउ परेकी नेपाली कांग्रेसकी सांसद माया राईविरुद्धको पुरक अभियोजनमा  काठमाडौं जिल्ला अदालतमा मुद्दा दायर भएको छ ।

३७ लाख ३५ हजार ८४३ रुपैयाँ बिगो मागदाबीसहित मंगलबार जिल्ला सरकारी वकिल कार्यालय बबरमहलले मुद्दा दायर गरेको हो । सांसद राई यो सहकारीको सहसचिव समेत थिइन् ।

उनको पालामा सहकारीको रकम अपचलन भएको थियो ।

यसअघि यो सहकारी ठगी प्रकरणमा २१ पुसमा ३९ जनाविरुद्ध काठमाडौं जिल्ला अदालतमा ६ सय ९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको भन्दै मुद्दा दायर भएको थियो ।

अहिले फेरि राईसहितका व्यक्तिलाई प्रतिवादी बनाउँदै पुरक अभियोजनमार्फत् मंगलबार सहकारी ठगीको कसुरमा मुद्दा दायर भएको हो । यसअघि सांसद राईलाई उन्मुक्ति दिँदै मुद्दा दर्ता भएको थियो ।

सांसद राईलाई उन्मुक्ति दिएको भन्दै आलोचना भएपछि १३ वैशाखमा प्रहरीले काठमाडौंको कपनबाट सांसद राईलाई पक्राउ गरेको थियो ।

उनीविरुद्ध सहकारी ठगी र संगठित अपराधको कसुरमा मुद्दा दर्ता भएको छ । संगठित अपराधको कसुरमा ६० दिनसम्म प्रहरी हिरासतमा राखेर अनुसन्धान गर्न सकिने व्यवस्था भएपनि सांसद राईको हकमा भने १७ दिनमै अदालतमा मुद्दा दर्ता भएको हो ।

प्रहरीले पक्राउ गरेर अनुसन्धान गर्ने क्रममा माइन्युटमा समेत सांसद राईले हस्ताक्षर गरेको भेटेको थियो । बयानका क्रममा समेत सांसद राईले उक्त हस्ताक्षर आफ्नै रहेको स्वीकार गरेकी छिन् ।

हाँडीगाउँमा एकै घरमा डेरा गरी बस्ने भूपेन्द्र राईको आग्रहमा हस्ताक्षर गरेको उनले बताएकी छिन् ।

‘भूपेन्द्र राई डेरा सरी जानु भन्दा अगाडी स्वर्णलक्ष्मी सहकारीका माइन्युटिङ निर्णय गरेको फोटोकपीहरू डेरा कोठामा नै लिएर आई मलाइ देखाए । दिदी यसमा तपाईंको नाम राखेको छ, तपाईंको नाम रहेको सम्पूर्ण कागजातहरूमा हस्ताक्षर गरी सहयोग गर्नुपर्‍यो भनेको हुँदा मैले विश्वासको आधारमा सही गर्न दिएको सबै कागजातहरूमा डेराबाटै सहीछाप गरिदिएकी हुँ,’ बयानमा उनले भनेकी छिन्, ‘के कुन कागजातहरूमा सही छाप गरेँ, उक्त समयमा थाहा भएन । मैले उक्त कागजातहरू नपढी नहेरी म सँगै बस्ने भूपेन्द्र राई भन्ने भाइको कुरामा विश्वास गरी हस्ताक्षर गरेकी हुँ ।’