‘मिसन इम्पोसिबल ८’ बन्यो भारतमा यसवर्ष सर्वाधिक ओपनिङ गर्ने हलिउड फिल्म

News Summary

Generated by OK AI. Editorially reviewed.

‘मिसन इम्पोसिबल’को आठौं श्रृंखलाले विश्वभर र नेपालमा प्रदर्शन तयारी गरेको छ।
भारतमा यस फिल्मले शुक्रबार १७.५० करोड भारु कमाइ गरी सर्वाधिक ओपनिङ गर्ने हलिउड फिल्म बनेको छ।
विश्लेषकहरूले यसले १६ देखि २० करोड भारुको ओपनिङ गर्ने अनुमान गरेका थिए र यसले सकारात्मक समीक्षा प्राप्त गरेको छ।

काठमाडौं । टम क्रुज स्टारर एक्सन-स्पाइ फिल्म ‘मिसन इम्पोसिबल’को आठौं श्रृंखला ‘द फाइनल रेकोनिङ’लाई लिएर विश्वभर पर्खाइ छ । नेपालसहित विश्वभर आउँदो शुक्रबारदेखि प्रदर्शन तयारीमा छ ।

भारतमा भने यो फिल्म गत शुक्रबारदेखि नै प्रदर्शनमा आएको छ । भारतीय बक्सअफिसमा यसले शुक्रबार आक्रामक ओपनिङ गरेको छ । यो फिल्म भारतमा सन् २०२५ मा सर्वाधिक ओपनिङ गर्ने हलिउड फिल्म बनेको छ ।

भारतीय फिल्मको बक्सअफिस ट्रयाकर स्याकनिल्कका अनुसार फिल्मले शुक्रबार १७.५० करोड भारु कमाइ गरेको छ । सबै भाषामा टम क्रुजको उक्त फिल्मले कमाइ गरेको द इण्डियन एक्सप्रेसले उल्लेख गरेको छ ।

विश्लेषकले यो फिल्मले १६ देखि २० करोड भारुसम्म ओपनिङ गर्ने अनुमान गरेका थिए । भारतमा यो फ्रेन्चाइजको लोकप्रियता र बलियो एड्भान्स बुकिङले फिल्मले आक्रामक ओपनिङ गरेको विश्लेषण गरिएको छ ।

यसवर्ष भारतमा रिलिज भएका अन्य अन्तर्राष्ट्रिय फिल्मको ओपनिङलाई उछिन्दै ‘द फाइनल रेकोनिङ’ले यति कमाइ गरेको हो । यसले यस शुक्रबारदेखि प्रदर्शनमा आएको हलिउडकै ‘द फाइनल डेस्टिेनेसन : ब्लडलाइन्स’ र मार्वलको ‘थन्डरबोल्ट्स’को कमाइलाई समेत उछिनेको छ ।

यो फिल्मले समग्रमा सकारात्मक समीक्षा प्राप्त गरेको छ । यसैसाता कान्स फिल्म फेस्टिभलमा समेत प्रिमियर भएको यो फिल्मको एक्सनसहितका पक्षलाई दर्शकले रुचाएका छन् ।