सरकारका प्रवक्ताको प्रश्न– तीर्थ भट्टराई पक्राउ पर्दा गृहमन्त्रीले राजीनामा दिनुपर्ने ?

फाइल तस्वीर

News Summary

Generated by OK AI. Editorially reviewed.

सूचना, सञ्चार तथा प्रविधिमन्त्री पृथ्वीसुब्बा गुरुङले त्रिभुवन अन्तर्राष्ट्रिय विमानस्थलको अध्यागमन कार्यालयमा भएको अनियमिताको छानबिन गर्न आग्रह गरे।
गुरुङले भने, ‘इमिग्रेसनमा जे खालको अनियमितता भो भन्ने कुरामा छानबिन भएको छ। छानबिन हुन दिनुस्।’
अधिकारकर्मीहरुले गृहमन्त्री रमेश लेखकको संलग्नता देखिएको भन्दै राजीनामा मागिरहेका छन्।

११ जेठ, काठमाडौं । सरकारका प्रवक्ता समेत रहेका सूचना, सञ्चार तथा प्रविधिमन्त्री पृथ्वीसुब्बा गुरुङले त्रिभुवन अन्तर्राष्ट्रिय विमानस्थल अध्यागमन कार्यालयमा भएको अनियमिताबारे छानबिन हुन दिनुपर्ने प्रतिक्रिया दिएका छन् ।

आइतबार पार्टी केन्द्रीय कार्यालय, च्यासलमा सचिवालय बैठकअघि सञ्चारकर्मीसँग कुराकानी गर्दै उनले यस्तो प्रतिक्रिया दिएका हुन् ।

‘इमिग्रेसनमा जे खालको अनियमितता भो भन्ने कुरामा छानबिन भएको छ । छानबिन हुन दिनुस्,’ गुरुङले भनेका छन् ।

लगत्तै, एमाले उपमहासचिव समेत रहेका गुरुङलाई एक सञ्चारकर्मीले ‘गृहमन्त्रीको राजीनामा माग भइरहेको छ नि ?’ भन्दै प्रश्न गरेका थिए ।

जवाफमा गुरुङले भनेका छन्, ‘एउटा तीर्थ भट्टराई पक्राउ पर्छ, गृहमन्त्रीले राजीनामा दिनुपर्ने हुन्छ र ?’

विमानस्थल अध्यागमनमा भएको उक्त अनियमिततामा गृहमन्त्री रमेश लेखकको पनि संलग्नता देखिएको भन्दै राजीनामा माग भइरहेको छ ।

प्रतिपक्षी दल रास्वपाले राजीनामा माग गर्ने निर्णय नै गरेको छ । उता, गृहमन्त्री लेखकले भने आफूले कुनै अनियमितता गरेको प्रमाणित भए राजनीतिबाटै बिदा लिने घोषणा गरेका छन् ।

अहिले पार्टी कार्यालय च्यासलमा एमालेको सचिवालय बैठक जारी छ ।