माधव नेपालबारे सञ्चारमन्त्री : अख्तियारको कामलाई प्रतिशोधपूर्ण भन्नु गलत

फाइल फोटो

News Summary

Generated by OK AI. Editorially reviewed.

सञ्चारमन्त्री पृथ्वी सुब्बा गुरुङले पतञ्जलि जग्गा प्रकरणमा अख्तियारको कामकारबाहीलाई लिएर सरकारलाई दोष लगाउन नमिल्ने बताए।
अख्तियारले आफ्नो अधिकार प्रयोग गरेकोले यसलाई प्रतिशोध भन्नु गलत भएको उनको भनाइ छ।
भिजिट भिसा प्रकरणमा विपक्षी दलले सरकार र सत्तारुढ दलविरुद्ध प्रतिशोधको राजनीति गरिरहेको उनले आरोप लगाए।

२३ जेठ, काठमाडौं । सञ्चार तथा सूचना प्रविधिमन्त्री पृथ्वी सुब्बा (पीएस) गुरुङले पतञ्जलि जग्गा प्रकरणमा अख्तियारले गरेको कामकारबाहीमा सरकारलाई दोष लगाउनु उचित नभएको बताएका छन् ।

पतञ्जलि जग्गा प्रकरणमा बिहिबार अख्तियार दूरुपयोग अनुसन्धान आयोगले पूर्वप्रधानमन्त्री माधवकुमार नेपाल लगायतमाथि भ्रष्टाचार मुद्दा दायर गरेको थियो । शुक्रबार बिराटनगरमा सञ्चारकर्मीको कुराकानी गर्दै मन्त्री गुरुङले सरकार अधिनायकवादी हुन्छ भनेर नै संवैधानिक निकायहरु बनाइने गरिएको बताए ।

अख्तियारले आफ्नो अधिकार प्रयोग गरेर कानुनी प्रक्रिया शुरु गरेकोले यसलाई प्रतिशोध भन्नु गलत भएको उनको तर्क छ । सरकारले फाइल खोल्ने भनेर कतै नभनेको र अहिले पनि अख्तियारले आफ्नो संवैधानिक अधिकार प्रयोग गरेको मन्त्री गुरुङको भनाइ छ ।

त्यस्तै उनले भिजिट भिसा प्रकरणमा कुनै कर्मचारीले गलत गर्दैमा गृहमन्त्रीको राजीनामा माग्नु उपर्युक्त नहुने बताए । भिजिट भिसा प्रकरणमा विपक्षी दलले सरकार र सत्तारुढ दलविरुद्ध प्रतिशोधको राजनीति गरिरहेको उनको आरोप छ ।

मन्त्री गुरुङले निजामती सेवा ऐन तथा शिक्षा विधेयक सदन अवरुद्ध भएकाले टेबुल हुन नसकेको बताउँदै चालु बजेट अधिवेशनबाटै यो दुवै विधेयक पास हुने विश्वास व्यक्त गरे ।