बलिउड रेडकार्पेटमा मलिना जोशीको ‘सरप्राइज’

News Summary

Generated by OK AI. Editorially reviewed.

नेपाली अभिनेत्री तथा पूर्वमिस नेपाल मलिना जोशी मुम्बईको ‘बलिउड हंगामाज स्टाइल आइकन रेडकार्पेट २०२५’मा सहभागी भएकी छन्।
उनी नेपाली फेसन डिजाइनर मनिष राईको डिजाइनमा नीलो गाउनमा देखिइन् र बलिउड एन्ट्रीको सम्भावना जोडिएको छ।
कार्यक्रम ५ जुनमा जुहुको जेडब्लु मेरियटमा आयोजना भएको थियो, जसमा अक्षय कुमार र अन्य स्टारहरू उपस्थित थिए।

मुम्बई । अक्षय कुमार, वरुण धवन, शाहिद कपुरजस्ता चर्चित बलिउड स्टारहरू सहभागी ‘बलिउड हंगामाज स्टाइल आइकन रेडकार्पेट २०२५’मा नेपाली अभिनेत्री तथा पूर्वमिस नेपाल मलिना जोशी सहभागी भएकी छन् ।

केही दिनअघि मुम्बईमा आयोजित रेडकार्पेटमा मलिना नेपाली फेसन डिजाइनर मनिष राईको डिजाइनमा देखिइन् । नीलो रङको गाउनमा उनी गर्जियस देखिएकी थिइन् । उनले रेडकार्पेटमा महत्वपूर्ण स्पेस पाएको देखिएको छ ।

मलिनाले इन्स्टाग्रामबाट रेडकार्पेट इभेन्टको भिडियो सेयर गरेकी छन् । उनले यो समारोहमा सहभागी हुनुको पृष्ठभूमि त उल्लेख गरेकी छैनन् तर, उनको सम्भावित बलिउड एन्ट्रीसँग जोडेर हेरिएको छ ।

‘यो रेडकार्पेटमा उपस्थित हुँदा मलाई पहिलोपटक जस्तो महसुस भैरहेको छ’ उनले लेखेकी छन्, ‘एनजीएल तपाईंकी युवती बलिउड हंगामाको स्टाइल आइकन अवार्डमा सहभागी हुँदा नर्भस र भावुक महसुस गरिरहेकी छे ।’

सुरुमा आफूलाई कहिँकतै एक्लै गएजस्तो महसुस भएको र अझै राम्री देखिनसक्ने कुरा आफूलाई लागेको कुरा उनले उल्लेख गरेकी छन् । तरण आदर्श सम्पादक रहेको बलिउडको चर्चित वेबपोर्टल बलिउड हंगामा डटकमले वर्षेनी बलिउड आइकन अवार्ड आयोजना गर्छ ।

यो कार्यक्रम ५ जुनमा जुहुको जेडब्लु मेरियटमा भएको थियो । अक्षय कुमार, विद्या बालन, टाइगर श्राफ, सन्नी लियोनी, नुसरत भरुच्चा, जेनेलिया देशमुख, डेजी शाह, सोफी चौधरी र अवनीत कौर जस्ता स्टारहरू रेडकार्पेटमा प्रस्तुत थिए ।