गौरव दर्पणलाई ‘वर्ष स्रष्टा सम्मान २०८१’ प्रदान

News Summary

Generated by OK AI. Editorially reviewed.

मोरङको पथरी शनिश्चरे नगरपालिकाले गायक गौरव दर्पणलाई ‘वर्ष स्रष्टा सम्मान २०८१’ले सम्मान गरेको छ।
उनी ‘पूर्वै रमाइलो’सहितका गीतबाट परिचित छन् र २०० भन्दा बढी गीतमा संगीत भरेका छन्।
कार्यक्रममा दर्पणले विजेतालाई एक गीत निशुल्क रेकर्ड गरिदिने घोषणा गरे।

मोरङको पथरी शनिश्चरे नगरपालिकाले गायक गौरव दर्पणलाई ‘वर्ष स्रष्टा सम्मान २०८१’ले सम्मान गरेको छ । दोसल्ला, मुहारचित्र, २५ हजार नगद र सम्मान पत्रसहित उनलाई सम्मान प्रदान गरियो ।

कला साहित्य प्रवर्धन समितिको मनोनयनमा परेका उनी ‘पूर्वै रमाइलो’सहितका गीतबाट परिचित छन् । २ दशकदेखि कला प्रवर्धनमा लागेका दर्पणले सिर्जना गरेको उक्त गीत देश विदेशमा छरिएर बसेका नेपालीहरु माझ लोकप्रिय छ ।

दर्पणले २०० भन्दा धेरै गीतमा संगीत भरेका छन् । उनको आवाजमा ३ गीति एल्बम सार्वजनिक छन् भने २ एल्बममा संगीत छ । नगरपालिकामा गठित कलासाहित्य प्रवर्धन समितिले वर्षेनी १ जना स्रष्टालाई सम्मान गर्दै आएको छ ।

‘प्रथम पथरी शनिश्चरे सिङगिङ एण्ड डान्सिङ आईडल’ कार्यक्रमको समापनसँगै पुरस्कार वितरण कार्यक्रम राखिएको थियो । कार्यक्रममा गायनतर्फ निर्णायकको भूमिकामा रहेका दर्पणले विजेतालाई व्यक्तिगत र सुरसंगम रेकर्डिङ स्टुडियोसँगको सहकार्यमा एक गीत निशुल्क एउटा गीत रेकर्ड गरिदिने समेत घोषणा गरे ।