पाकिस्तानी हबिबले हिमालयन बैंकको सेयर बेच्दै, हिमालयन रिले किन्ने

News Summary

Generated by OK AI. Editorially reviewed.

नेपाल राष्ट्र बैंकको स्वीकृति पाएपछि पाकिस्तानको हबिब बैंकले हिमालयन बैंकको संस्थापक सेयर बेच्ने प्रक्रिया पूरा गरेको हो।
हबिबले २ करोड ८० लाख १२ हजार ४४७ कित्ता सेयर बिक्रीका लागि सार्वजनिक सूचना प्रकाशन गरेको छ।
सेयर खरिद गर्न इच्छुक संस्थापकले ३५ दिनभित्र आवेदन दिनुपर्ने र न्यूनतम मूल्य प्रतिकित्ता ११२ रुपैयाँ ८० पैसा तोकिएको छ।

३० जेठ, काठमाडौं । नेपाल राष्ट्र बैंकको स्वीकृति पाएसँगै पाकिस्तानको हबिब बैंकले हिमालयन बैंकमा रहेको संस्थापक सेयर बेचेर बाहिरिने प्रक्रिया पूरा भएको छ ।

हबिबसँग रहेको पूरा २ करोड ८० लाख १२ हजार ४४७ कित्ता संस्थापक सेयर बेच्नका लागि शुक्रबार सार्वजनिक सूचना प्रकाशन भएको छ । स्रोतका अनुसार हिमालयन रिइन्स्योरेन्सले उक्त सेयर खरिद गर्नेगरी सहमति भइसकेको छ । औपचारिक प्रक्रिया पूरा गर्नका लागि शुक्रबार सार्वजनिक सूचना जारी गरिएको हो ।

पाकिस्तानको हबिब बैंकले कोभिड-१९ महामारी अगाडि नै २०७६ मा हिमालयन बैंकको सेयर बेचेर बाहिरिन खोजेको थियो ।

संस्थापक सेयर किन्न विद्यमान संस्थापक सेयरधनीलाई नै पहिलो प्राथमिकता दिनुपर्ने नीतिगत व्यवस्थाका कारण बाहिरी पक्षलाई बिक्री गर्न पाएको थिएन ।

३५ दिनभित्र सो सेयर खरिदका लागि अब इच्छुक संस्थापकले आवेदन दिन सक्ने बैंकले सार्वजनिक सूचनामार्फत जनाएको छ । न्यूनतम मूल्य प्रतिकित्ता ११२ रुपैयाँ ८० पैसा कायम हुनेगरी आवेदन दिनुपर्ने छ ।

हबिबले एकमुष्ट सम्पूर्ण संस्थापक सेयर बिक्रीको लागि निवेदन दिएको हिमालयन बैंकले जनाएको छ ।