ग्लोबल आईएमई क्यापिटलको ‘समुन्नत योजना २’ म्युचुअल फन्ड २२ असारमा निष्कासन हुने

१९ असार, काठमाडौं । ग्लोबल आईएमई क्यापिटल लिमिटेडले २२ असारदेखि सामूहिक लगानी कोष ‘ग्लोबल आईएमई समुन्नत योजना २’ को इकाइ सार्वजनिक निष्कासनमा ल्याउने भएको छ ।

यो योजना प्रारम्भमा १ अर्ब २० करोडको कोष आकारबाट सुरु हुनेछ भने बढीमा २५ प्रतिशतसम्म वृद्धि गर्दै १ अर्ब ५० करोडसम्म विस्तार गर्न सकिने ‘ग्रिनसुओ अप्सन’ सहित व्यवस्था गरिएको छ ।

यस योजनाले इक्विटी तथा निश्चित आम्दानीयुक्त साधनमा लगानी गरी सन्तुलित रूपमा जोखिम व्यवस्थापन गर्दै लगानीकर्तालाई दीर्घकालीन लाभ दिने उद्देश्य राख्दछ ।

योजना पूर्णरूपमा म्युचुअल फन्ड नियमावली २०६७ अनुसार सञ्चालनमा ल्याइएको छ, जसले पारदर्शिता, लगानीकर्ता संरक्षण तथा उचित कोष व्यवस्थापन सुनिश्चित गर्दछ ।

समुन्नत योजना २ का विशेषता

योजनाको प्रकार : बन्दमुखी योजना

फन्ड नाम : ग्लोबल आईएमई म्युचुअल फन्ड

योजना नाम : ग्लोबल आईएमई समुन्नत योजना २

कोष आकार : प्रारम्भिक १ अर्ब २० करोड (अत्यधिक माग भए १ अर्ब ५० करोडसम्म)

प्रतिइकाइ मूल्य : १० रुपैयाँ

सर्वसाधारणमा निष्कासन गरिने इकाइ : १२ करोड इकाइ

न्यूनतम लगानी : १०० इकाइ

अधिकतम लगानी : योजनाको १० प्रतिशत अर्थात् १ करोड २० लाख इकाइ

योजना अवधि : इकाइ बाँडफाँट मिति देखि १० वर्ष

लाभांश नीति : प्राप्त मुनाफाबाट वितरण, बाँकी रकम पुनः लगानी

सूचीकरण : नेपाल स्टक एक्स्चेन्ज (नेप्से) मा सूचीबद्ध

प्रारम्भिक लगानी : १५ प्रतिशत (फन्ड प्रायोजक र व्यवस्थापक)

व्यवस्थापन शुल्क : नेट सम्पत्ति मूल्यको १.५० प्रतिशत

डिपोजिटरी शुल्क : नेट सम्पत्ति मूल्यको ०.२० प्रतिशत

लगानी मिश्रण

इक्विटी/इक्विटी सम्बन्धी साधनहरू : ७०–९० प्रतिशत (उच्च जोखिम)

ऋणपत्र : निश्चित आम्दानी साधनहरू : ०–१० प्रतिशत (मध्यम जोखिम)

फिक्स्ड डिपोजिट : ०–१० प्रतिशत (न्यून जोखिम)

नगद/आईपीओ/अन्य म्युचुअल फन्ड : ०–१० प्रतिशत (न्यून जोखिम)

लगानी गर्नुपर्ने कारण

व्यावसायिक व्यवस्थापन

विविधीकरण

सहजता र पहुँच

सस्तो लगानी

पारदर्शिता

कर छुट

लगानीकर्ता संरक्षण

लगानी प्रतिफल

आईएमई क्यापिटलले यस योजनाको वार्षिक औसत प्रतिफल २२.४९ प्रतिशत रहने प्रक्षेपण गरेको छ । यस अनुसार यस योजनाका इकाइधनीले १० वर्षमा कुल २२४.९६ प्रतिशत प्रतिफल प्राप्त गर्नेछन् ।

यस योजनाको अनुमानित आन्तरिक प्रतिफल दर १६.८८ प्रतिशत रहने प्रक्षेपण छ । क्यापिटलले यस योजनाका इकाइधनीलाई पहिलो ९ वर्षसम्म ८ देखि २० प्रतिशतसम्म लाभांश वितरण गर्ने सक्ने प्रक्षेपण गरेको छ ।

ग्लोबल आईएमई म्युचुअल फन्ड अन्तर्गत हाल २ योजना सञ्चालनमा छन् । जसमध्ये समुन्नत योजना १ ले ७ वर्षमा १ सय ४ प्रतिशत लाभांश वितरण गरेको छ भने १०.१६ प्रतिशत फन्ड पुनः खरिद प्रतिफल दिएको छ । त्यस्तै १० वर्ष अवधिको ग्लोबल आईएमई ब्यालेन्स्ड फन्ड १ को १.०२५ अर्ब कोष आकार रहेको छ ।

यस योजनाको व्यवस्थापक ग्लोबल आईएमई क्यापिटल लिमिटेड हो । यो क्यापिटल नेपालकै पहिलो विशुद्ध मर्चेन्ट बैंकर हो जुन सन् २००८ मा स्थापना भएको थियो । यो क्यापिटल नेपाल धितोपत्र बोर्डबाट मर्चेन्ट बैंकरको लाइसेन्स प्राप्त बैंक रहेको छ जसमा ग्लोबल आईएमई बैंकको ८१.५० प्रतिशत स्वामित्व छ ।

यस योजनाको इकाइमा लगानीकर्ताले धितोपत्र बोर्डबाट स्वीकृति प्राप्त गरेका सम्पूर्ण आस्वा सदस्य बैंक तथा वित्तीय संस्था र तिनका तोकिएका शाखा कार्यालयबाट आवेदन दिन सक्नेछन् ।

यसका साथै सीडीएस एन्ड क्लियरिङ लिमिटेडबाट निर्माण गरिएको सफ्टवेयर ‘मेरो सेयर’ अनलाइन प्रयोग गरी सि–आस्वा प्रणाली मार्फत पनि आवेदन दिन सक्नेछन् ।

यस योजनाको निष्कासनका लागि गराएको रेटिङमा क्रेडिट रेटिङ संस्था इक्रा नेपालले कोष प्रवर्द्धकलाई इक्राएनपी इस्युअर रेटिङ ए माइनस प्रदान गरेको छ भने योजना व्यवस्थापकलाई इन्फोमेरिक्स क्रेडिट रेटिङले आईआरएन एएमसी क्वालिटी ३ प्लस रेटिङ प्रदान गरेको छ ।