तिलिचो तालमा सोलारबाट बिजुली

News Summary

Generated by OK AI. Editorially reviewed.

नेपाल विद्युत् प्राधिकरणले मनाङस्थित तिलिचो तालमा ३९० वाटको सौर्य प्यानल राखी विद्युत् आपूर्ति गरेको छ।
मनाङ वितरण केन्द्र प्रमुख राजु महतोले सौर्य प्यानलबाट विद्युत् आपूर्ति भएपछि पर्यटकलाई मोबाइल फोन चार्ज गर्न सहज भएको बताए।
तिलिचो तालको आधार शिविरमा राष्ट्रिय प्रसारण लाइनबाट विद्युत् आपूर्ति भइरहेको छ र ताल वरिपरि बस्ती नभएकाले सौर्य ऊर्जाबाट व्यवस्था गरिएको छ।

२ साउन, काठमाडौं । हिमालपारिको जिल्ला मनाङस्थित समुद्र सतहबाट ४ हजार ९ सय ४९ मिटर उचाइमा रहेको पर्यटकीय स्थल तिलिचो तालमा सौर्य ऊर्जाबाट विद्युत् आपूर्ति गरिएको छ ।

नेपाल विद्युत् प्राधिकरणले ३९० वाटको सौर्य प्यानल राखी तिलिचो तालमा विद्युत् आपूर्तिको व्यवस्था गरेको हो । प्राधिकरण मनाङ वितरण केन्द्र प्रमुख राजु महतोले केही दिनदेखि सौर्य प्यानल व्यवस्था गरी तिलिचो तालमा बिजुली बालिएको बताए ।

बिजुली पुगेपछि त्यहाँ जाने स्वदेशी तथा विदेशी पर्यटकलाई मोबाइल फोन चार्ज गर्न सहज भएको केन्द्र प्रमुख महतोले उल्लेख गरे ।

मनाङ ङिस्याङ गाउँपालिका–९ खाङ्सारस्थित समुद्री सतहबाट ४ हजार २ सय ५० मिटर उचाइमा रहेको तालको आधार शिविर (बेस क्याम्प) सम्म भने यसअघि नै राष्ट्रिय प्रसारण लाइनको विद्युत् पुगिसकेको छ ।

बेस क्याम्पमा ५० केभीए क्षमताको वितरण ट्रान्सफर्मर राखी विद्युत् आपूर्ति दिइएको हो । बेस क्याम्पबाट ताल पुग्न करिब ३ घण्टा हिँड्नु पर्छ । ताल वरिपरि बस्ती पनि नभएकाले तत्कालका लागि सौर्य ऊर्जाबाट विद्युत् आपूर्ति व्यवस्था गरिएको महतोले बताए ।