जगदुल्ला हाइड्रोबारे लेखा समितिको निर्णयमा माओवादी, रास्वपा र स्वतन्त्र सांसदको फरक मत

९ साउन, काठमाडौं । जगदुल्ला हाइड्रोपावरबारे प्रतिनिधिसभा अन्तर्गतको सार्वजनिक लेखा समितिको निर्णयमा विपक्षी दलहरूले फरकमत राखेका छन् ।

माओवादी केन्द्र, राष्ट्रिय स्वतन्त्र पार्टी (रास्वपा) र स्वतन्त्र सांसद अमरेशकुमार सिंहले फरक मत राखेका हुन् ।

‘जगदुल्ला हाइड्रोपावरको निर्माण सम्बन्धी बोलपत्र आह्वान तथा प्रक्रियामा, मूल्याकंन समितिको निर्णय आदिमा नक्कली कागजात पेश भएको, गलत मनसायका साथ प्रक्रियामा समेत चलखेल भएको देखिएको लगायतका गम्भीर प्रश्न उठेका छन्’, उनीहरूको फरक मतमा उल्लेख छ ।

यसअघि लेखा समितिले कानुन अनुसार जगदुल्ला हाइड्रोपावरको निर्माण अगाडि बढाउन निर्देशन दिएको थियो । जसमा माओवादी केन्द्रका सांसद अमनलाल मोदी, रास्वपाका मनिष झा, असिम शाह र हरि ढकाल तथा स्वतन्त्र सांसद सिंहले फरक मत राखेका हुन् ।

यो विषयमा मूल्याकंन समितिका पदाधिकारीहरू सहित जगदुल्ला हाइड्रोपावरको सीईओ (प्रमुख कार्यकारी अधिकृत) र यसमा जोडिएका अन्य पदाधिकारीहरूको संलग्नताको आवश्यक छानबिन गरी सत्यतथ्य पत्ता लगाउनुपर्ने उनीहरूको माग छ ।

यसबारे अध्ययन अनुसन्धान तथा छानबिन हुन आवश्यक रहेको भन्दै उनीहरूले फरक मत राखेको बताएका छन् ।

छानबिन प्रक्रिया अगाडि नबढाई निर्माण प्रक्रिया अगाडि बढाउँदा भ्रष्टचार र अनियमितता हुने भएकोले जिम्मेवार निकायहरु अख्तियार दुरुपयोग अनुसन्धान आयोग, केन्द्रीय अनुसन्धान ब्यूरो, सार्वजनिक खरिद अनुगमन कार्यालयको ध्यानाकर्षण गर्नुपर्ने उनीहरूको माग छ ।

स्याङ्चेन हाइड्रोपावर परियोजना चीनमा छ कि छैन समेतको प्रश्नसहित सम्बन्धित चिनियाँ दूतावास, चीन सरकार लगायतका निकायले १५ दिनभित्र छानबिन गरी प्रतिवेदन सार्वजनिक लेखा समितिमा पेश गर्न निर्देश गर्नुपर्ने उनीहरूको माग छ ।