एभरेष्ट महिला भलिबल लिग : महिलाहरूका लागि रोजगारी सिर्जना गर्दै

९ साउन, काठमाडौं । नेपाली महिला भलिबलमा वात्सल्य एभरेष्ट महिला भलिबल लिग (इडब्लुभिएल) एक ऐतिहासिक कदमको रुपमा अघि बढेको छ ।

खेलकुदमा महिला सशक्तिकरणतर्फको ऐतिहासिक कदमस्वरूप वात्सल्य एभरेस्ट महिला भलिबल लिग (इडब्लुभिएल) ले १०० भन्दा बढी महिलाहरुको लागि रोजगारी सिर्जना गरेको छ । जुन अन्तर्राष्ट्रिय खेलकुद जगतमै उदाहरणीय बनेको छ ।

‘पहिलो संस्करणमा लिगले राष्ट्रिय, अन्तर्राष्ट्रिय गरी ७२ जना महिला खेलाडी, १५ जना व्यवस्थापन क्षेत्रमा, १० जना मिडिया क्षेत्रमा र ५ जना प्राविधिक क्षेत्रमा महिलालाई रोजगारीको अवसर दिएको थियो,’ इडब्लुभिएलकी सिइओ स्नेभी चापागाईँले भनिन्, ‘इडब्लुभिएलको २०२५ को दोस्रो संस्करणमा यो संख्या अझै बढाउने योजनामा हामी छौँ ।’

यससँगै, लिगले नेपालकै पहिलो र सबैभन्दा कान्छो महिला खेलकुद लिग सिइओ स्नेभी चापागाईंलाई नेतृत्वमा ल्याएर सशक्त सन्देश दिएको छ ।

त्यसैगरी शुभेक्षा खड्कालाई नेपालको खेलकुद इतिहासकै पहिलो महिला अक्सनयरका रूपमा चिनाएको छ । इडब्लुभिएलको दोस्रो संस्करणको लागि पहिलो पटक जुलाई १८ मा ऐतिहासिक अक्सन आयोजना गरिएको थियो ।

यी सबै तथ्यांकहरूले देखाउँछ कि लिग महिलालाई परम्परागत रूपमा पछाडि पारिएको खेल व्यवस्थापनमा समावेश गराउँदै समावेशी विकास र लैङ्गिक समानताको गहिरो प्रतिबद्धता दर्शाउँदै छ ।

इडब्लुभिएलले खेलकुद प्रशासनमा परम्परागत संरचनालाई चुनौती दिँदै, महिलाहरूका लागि नेतृत्व र प्राविधिक भूमिकामा स्थान दिलाउने कार्य गरिरहेको छ । लिगले आफ्नो नारा #अबपालोमहिलाको लाई सार्थक रुपमा जीवन्त बनाइरहेको छ ।

विश्वभर नै खेल नेतृत्वमा महिलाको सहभागिता न्यून रहेको बेला इडब्लुभिएलले नयाँ मानक कायम गर्दैछ । यो लिग खेलाडी सीमित नभई खेल व्यवस्थापन, प्रसारण, डिजिटल मिडिया, लगिस्टिक र टिम अपरेसन जस्ता क्षेत्रमा पनि महिलाहरूलाई रोजगारीको अवसर दिइरहेको छ, जसले महिलाहरूका लागि सुरक्षित आर्थिक अवसरको वातावरण सिर्जना गरिरहेको छ ।

नेपालको खेलकुद परिदृश्यमा परिवर्तन ल्याउँदै, यो लिग अहिले महिलामैत्री खेल नवप्रवर्तनको नमुनाका रूपमा विश्वमै चासोको विषय बन्दैछ । खेलकुदको सम्पूर्ण क्षेत्रमै महिलाको आवाज र उपस्थिति बिस्तार गर्दै, वात्सल्य इडब्लुभिएल एक वैश्विक उदाहरणको रूपमा उदाउँदै छ ।

लिगको दायरा र प्रभाव निरन्तर बढ्दै जाँदा, यसले नेपाल र दक्षिण एसियाभरका युवतीहरूका लागि नयाँ ढोका खोल्ने अपेक्षा गरिएको छ, जसले खेलकुदमा अधिक समान र समावेशी भविष्य निर्माणको आधार तयार गर्नेछ ।

नेपाली खेलकुद क्षेत्र, विशेष गरी महिला भलिबलको इतिहासमा एभरेष्ट महिला भलिबल लिग एक महत्वपूर्ण अध्याय सुरु भएको छ ।

नेपाली भलिबलमा पहिलोपटक फ्रेन्चाइज मोडेलमा आधारित रहेर गत वर्ष देखि एभरेष्ट महिला भलिबल लिग सुरु गरिएको हो । जसले भलिबल मात्र नभई नेपाली महिला खेलकुदकै भविष्यमा नयाँ आशा र सम्भावनाको ढोका खोलिदिएको छ ।

भलिबल नेपालको राष्ट्रिय खेल हो र भौगोलिक रुपमा यो नेपालको सबै क्षत्रेमा खेल्न मिल्छ । त्यसमा पनि महिला भलिबल अझ धेरै चर्चित छ । पछिल्लो केही वर्षदेखि नेपाली महिला भलिबलले निरन्तर उचाइ लिइरहेको छ । महिला राष्ट्रिय टोलीले विभिन्न अन्तर्राष्ट्रिय प्रतियोगितामा प्रभावशाली प्रदर्शन गर्दै उपलब्धीहरु समेत हासिल गरेको छ ।

तर त्यस प्रदर्शनलाई दीर्घकालीन र पेशागत बनाउने आधारभूत संरचनाको भने अभाव नै थियो । यही सन्दर्भमा इन्फिनिटी ड्रिम्स प्रालीले एभरेष्ट महिला भलिबल लिगको सुरुवात गर्दै नेपाली भलिबललाई व्यावसायिक संरचनातर्फको छलाङको रुपमा हेरिएको छ ।

पहिलो संस्करणमा विभिन्न ६ फ्रेन्चाइज टिमले इडब्लुभिएलमा सहभागिता जनाएका थिए । जसमा कर्णाली प्रदेशको प्रतिनिधित्व गरेको कर्णाली यश्विसले अपराजित रहेर उपाधि जितेको थियो ।

दोस्रो संस्करण आगामी भदौ अन्तिममा आयोजना हुँदैछ । जसमा ६ टिमले नै प्रतिस्पर्धा गर्नेछन् । ती टिमहरूलाई निजी क्षेत्र, व्यवसायी, र खेलप्रेमी समुहले संचालन गरेका छन् । हरेक टिममा नेपाली ९ र विदेशी ३ गरी कूल १२ खेलाडी समावेश हुनेछन् ।

नेपाली खेलाडीमा राष्ट्रिय अन्तर्राष्ट्रिय स्तरमा अनुभव बटुलेका खेलाडीसँगै स्थानिय स्तरमा उदाउँदै गरेका युवा खेलाडीहरु समेत हुनेछन् । हरेक टिमले ट्यालेन्ट हन्ट मार्फत एक खेलाडी टिममा समावेश गर्नेछन् ।