चितवनमा गोविन्दे हात्तीको आक्रमणबाट एक सैनिक घाइते

फाइल तस्वीर

News Summary

Generated by OK AI. Editorially reviewed.

चितवन राष्ट्रिय निकुञ्जको सौराहा नजिकै नेपाली सेनाका हवल्दार नन्दबहादुर सिंहलाई जंगली हात्ती गोविन्देले आक्रमण गरी घाइते बनाएको छ।
सेनाले तीन राउन्ड हवाई फायर गरेको थियो । घाइते सिंहलाई रत्ननगर बकुलहर अस्पतालमा उपचार भइरहेको छ।

१४ साउन, चितवन । चितवन राष्ट्रिय निकुञ्जको सौराहा क्षेत्र नजिकै रहेको पोस्टबाट डिउटी सकेर फर्किँदै गरेका नेपाली सेनाका एक हवल्दारलाई जंगली हात्ती गोविन्देले आक्रमण गरी घाइते बनाएको छ ।

निकुञ्ज स्रोतका अनुसार बुधबार बिहान ७ बजे सौराहाबाट डेढ किलोमिटर पर रहेको मचानबाट रातिको डिउटी सकेर कछुवानी पोस्टतर्फ फर्कँदै गरेका ४ जना सैनिकलाई गोविन्देले आक्रमण गरेको थियो ।

एक्कासी जम्काभेट भएको गोविन्दले पैदल फर्किँदै गरेका सेनामाथि आक्रमण गरेको थियो । हात्तीको आक्रमणबाट ३८ वर्षीय नन्दबहादुर सिंह घाइते भएका हुन् ।

सिंहमाथि आक्रमण गर्ने बित्तिकै सेनाले ३ राउन्ड हवाई फायर गरेको थियो । हवाई फायरपछि गोविन्दे भागेको थियो ।

घाइते सिंहको हात र ढाडमा चोट लागेको छ । उनको रत्ननगर बकुलहर अस्पतालको आकस्मिक कक्षमा उपचार भइरहेको छ ।

कछुवानी पोस्टमा ११ जना सैनिक बस्दै आएका छन् । यसअघि, सेना तथा निकुञ्जको टोलीमाथि आक्रमण गर्न आएपछि सेनाले हानेको गोली लागेर जंगली हात्ती मकुनाको मृत्यु भएको थियो ।