‘मलाई ओटीटीको १२५ करोड होइन, आमदर्शकको १०० रुपैयाँ चाहिन्छ’

मुम्बई । विशेष निर्णयबारे जानकारी दिन बलिउड अभिनेता आमिर खानले केही दिनअघि पत्रकार सम्मेलन बोलाए । कुन विषयमा प्रेसमिट आयोजना गरिएको हो भन्ने पूर्वसूचना नदिई बोलाएपछि पत्रकारलाई पनि यसबारे निकै चासो थियो ।

स्टेजमा उभिएर आमिरले घोषणा गरे- उनको हालैको फिल्म ‘सितारे जमीन पर हलबाट उत्रिएपछि ओटीटीमा रिलिज हुनेछैन ।’

केही समयदेखि यसबारे अनुमान लगाइएको थियो । आमिरले पनि युट्युब रिलिजको योजनालाई न कहिल्यै पुष्टि गरे, न अस्वीकार । उनी बलिउडका ट्रेन्डसेटर हुन् भन्ने कुरा धेरैलाई थाहा छ । उनले यो घोषणा आफ्नो स्टाइलमा गरे ।

उनले भाषण सुरु गर्दै भारतमा अनलाइन भिडियो प्लेटफर्मको सन्दर्भमा युट्युबले कसरी सबैभन्दा बढी पहुँच हासिल गरिरहेको छ भनेर व्याख्या गरे । युपिआईको उदयसँगै, जनतालाई सजिलैसँग इलेक्ट्रोनिक भुक्तानी गर्न सजिलो भएको छ । त्यसैले, सुपरस्टारले युट्युबको बाटो रोज्ने निर्णय गरे ।

जब उनी युट्युबको महत्व बुझाउँदै थिए र आफ्नो फिल्मलाई देशका दुर्गम कुनाहरूमा पुर्‍याइरहेका थिए, स्क्रिन पछाडिको पर्दामा सितारे जमीन परको पोस्टर देखाइएको थियो । पोस्टरसँगै, यो स्पोर्ट्स ड्रामा फिल्म अगस्ट १ शुक्रबार आमिर खानको युट्युब च्यानल, अर्थात् आमिर खान टकिजमा रिलिज हुने कुरा पनि उल्लेख गरिएको थियो ।

फिल्मलाई युट्युबमा पे-पर-भ्यूको आधारमा दर्शकले १०० भारु तिरेर हेर्नुपर्छ ।

एक पत्रकारको प्रश्नका उनको जवाफ थियो, ‘मलाई (पे–पर–भ्यू’) मोडेलमा धेरै विश्वास छ र म तपाईंलाई यसको जवाफ दिनेछु । मलाई ओटीटी प्लेटफर्महरूबाट १२५ करोड रुपैयाँ चाहिँदैन । मलाई हाम्रो देशको आम दर्शकको १०० रुपैयाँ चाहिन्छ । (मुझे वो बडी कम्पनी के १२५ करोड रुपैयाँ नहीं चाहिए । मुझे मेरी दर्शक का सौ रुपैयाँ चाहिए) । म मेरो काममा विश्वास गर्छु र म मेरा दर्शकमा विश्वास गर्छु यदि मेरो कामको मूल्य छ भने, दर्शकले पहिले थिएटरमा फिल्म हेर्नेछन् र त्यसपछि पे–पर–भ्यूमा युट्युबमा हेर्नेछन् ।’

ओटीटी सम्झौताहरूको बारेमा थप कुरा गर्दै, उनले व्याख्या गरे, ‘सिनेमा को उससे नोक्सान हो रहा है । यस्तो सम्झौताले मलाई मात्र फाइदा पुर्‍याउँछ । म यो गर्न सक्दिन । यसले लामो समयसम्म उद्योगलाई असर गर्नेछ । त्यसैले, मैले अस्वीकार गरें ।’