सिड्नीमा नेपाली फिल्म ‘पीआर’को प्रिमियर

सिड्नी । अष्ट्रेलियाको सिड्नीमा शनिबार फिल्म ‘पीआर’को रेडकार्पेट प्रिमियर गरिएको छ । सिड्नीको हर्सभिलमा रहेको इभेन्ट र भी-म्याक्स हलमा रेड कार्पेट प्रिमियर गरिएको हो ।

एकसाथ ४ हलमा रेडकार्पेट प्रिमियर गरिएको हो । आइतबार सिड्नीको बरूउडमा रहेको इभेन्ट सिनेमामा थप प्रिमियर कार्यक्रम तय भएको छ ।

यही फिल्मको प्रदर्शनका लागि अहिले अष्ट्रेलियाको सिड्नी आइपुगेका निर्देशक शोभित बस्नेतले रेडकार्पेट प्रिमियरपछि अनलाइनखबरसँग भने, ‘सिड्नीमा रहनु हुने दर्शकले यो फिल्म मन पराउनुभएको छ । हामी निकै उत्साहित छौं । यति धेरै माया देखाउनुभएको कारण अन्य विशेष पनि गर्ने योजनामा छौं ।’

अष्ट्रेलियामा नै छायांकन गरिएको र त्यहाँ बसोबास गर्दै नेपाली कलाकारको अभिनय रहेको कारण पनि यो फिल्मको चर्चा यतिबेला राम्रो छ । स्थायी आवासीय अनुमतिपत्र पाउन नेपाली विद्यार्थीले गर्ने संघर्षको कथावस्तुमा फिल्म बनेको छ ।

निर्माता रञ्जित शाहले फिल्मले अष्ट्रेलियामा संघर्षरत युवायुवतीको दुःख र संघर्षको कथा पेश गरेकाले दर्शकले रुचाएको बताए ।

‘अस्ट्रेलिया आउन चाहने विद्यार्थीले एकपटक यहाँको यथास्थिति र वास्तविकता बुझ्न भए पनि फिल्म पीआर हेर्दा राम्रो हुन्छ सम्म हामी भन्न सक्छौं’ रञ्जिन भन्छन्, ‘फिल्म पीआर अस्ट्रेलियामा रहेको नेपाली समाजको चित्रण हो ।’