प्रतिनिधिसभा कार्यव्यवस्था परामर्श समितिको बैठक जारी

१३ भदौ, काठमाडौं। प्रतिनिधिसभा कार्यव्यवस्था परामर्श समितिको बैठक जारी छ ।

आज सभामा प्रधानमन्त्री केपी शर्मा ओलीले सम्बोधन गर्दैछन् । यसका अलावा भूमी सम्बन्धी केही नेपाल ऐन संशोधन विधेयक पारित गर्ने तालिका छ । संसदीय सुनुवाइ समितिको सदस्य हेरफेरको कार्यसूची पनि छ ।

प्रतिनिधि सभाले भदौ ३० गतेसम्मको क्यालेन्डर तय गरेको छ । उक्त क्यालेन्डर अनुसार सभा अगाडि बढाउने विषयमा कार्यव्यवस्था परामर्श समितिको बैठकमा छलफल जारी छ ।

क्यालेन्डर अनुसार आज भूमि विधेयक पास गर्ने तयारी छ । भदौ १८ गते बस्ने प्रतिनिधि सभाको बैठकले नागरिकतासम्बन्धी विधेयक पारित गर्नेछ ।

संघीय निजामती सेवा विधेयक यही भदौ १९ गते प्रतिनिधि सभाबाट पारित गरिनेछ । यो विधेयक यसअघि १५ असार २०८२ मा प्रतिनिधि सभाबाट पास भएर राष्ट्रिय सभामा गएको थियो। राष्ट्रिय सभाले यही भदौ १६ गतेभित्र प्रतिनिधि सभामा उक्त विधेयक फिर्ता गरिसक्नुपर्छ ।

राष्ट्रिय सभाबाट फिर्ता आएपछि भदौ १९ गते निजामती सेवा विधेयक पारित गरेर सभामुख हुँदै राष्ट्रपतिकहाँ पठाउने तयारी छ । राष्ट्रपतिले प्रमााीकरण गरेपछि ऐनका रुपमा कार्यान्वयनमा आउँछ ।

यस्तै सभामुख र पाँच राजनीतिक दलका प्रमुख सचेतक र सचेतकहरूको बैठकले यही भदौ २६ गते विद्यालय शिक्षा विधेयकलाई पारित गर्ने सम्भावित क्यालेन्डर तय गरेका छन् ।

विद्यालय शिक्षा विधेयक यही भदौ ५ गते संसदीय समिति (शिक्षा, स्वास्थ्य तथा सूचना प्रविधि समिति)ले पास गरेर भदौ ६ गते प्रतिनिधि सभामा विधेयकको प्रतिवेदन पेस गरेको छ ।

यसलाई भदौ २६ गते पास गरेर राष्ट्रिय सभामा पठाउयने गरी प्रतिनिधि सभाले सम्भावित कार्यतालिका तय गरेको हो ।

राष्ट्रिय सभाले पनि पास गरेपछि पुनः प्रतिनिधि सभामा आउँछ । प्रतिनिधि सभामा फर्किएपछि सभामुख हुँदै राष्ट्रपतिकहाँ पुग्छ । राष्ट्रपतिले प्रमाणीकरण गरेपछि ऐनका रुपमा रुपान्तरित हुन्छ ।