हेटौंडाका सरसफाइ मजदुर पहिलोपटक सामाजिक सुरक्षा कोषमा आबद्ध

१३ भदौ, हेटौंडा । हेटौंडा उपमहानगरपालिका भित्र फोहोरमैला व्यवस्थापनमा खटिएका सरसफाई मजदुरलाई सामाजिक सुरक्षा कोषमा आबद्ध गरिएको छ ।

उपमहानगरसँगको साझेदारीमा २०६६ सालदेखि फोहोरमैला व्यवस्थापनको काम गर्दै आएको ग्रिन एण्ड क्लिन सिटी सर्भिस प्रालिले २१ जना महिलासहित ५३ जना मजदुरलाई कोषमा आबद्ध गराएको हो ।

नगर प्रमुख मिनाकुमारी लामाले सरसफाई मजदुरको सुरक्षामा उपमहानगरपालिकाले ध्यान दिँदै आएको बताइन् ।

कम्पनीका सञ्चालक नवराज खतिवडाले मजदुरहरुलाई स्वास्थ्य बीमा कार्यक्रममा जोड्ने तयारी रहेको बताए । ‘फोहोरमैला व्यवस्थापन गर्ने मजदुरहरुको भविष्य सोचेर उनीहरुको सुरक्षाका लागि कोषमा आबद्ध गराएका हौं । उहाँहरुलाई स्वास्थ्य बीमामा पनि जोड्छौं,’ उनले भने ।

उपमहानगरको वन तथा वातावरण शाखाकी इन्जिनियर चन्दा खड्काले देशमै पहिलो पटक सरसफाइ कामदारहरूलाई सामाजिक सुरक्षा कोषमा आबद्ध गराएको बताईन । उनले कोषमा उपमहानगरले नै आबद्ध गराउनुपर्ने भएपनि कम्पनीले गरेको र पालिकाले स्वास्थ्य बीमा कार्यक्रम कार्यान्वयन गर्ने जानकारी दिइन् ।

हेटौंडाको १९ वटा वडामध्ये १, २, ४, ५ र १० नम्बर वडामा हप्ताको ४ पटक दुईदिन जैविक र दुईदिन अजैविक फोहोर संकलन भइरहेको छ । ६ र १९ नम्बर वडामा महिनाको ४ पटक र बाँकी वडामा महिनाको २ पटक फोहोर संकलन भइरहेको कम्पनीले जनाएको छ ।

हेटौंडा सहरलाई साउन २०७४ मा सरकारले देशकै सफा शहर घोषित गरेको थियो । नेपाल सरकार, संघीय मामिला तथा स्थानीय विकास मन्त्रालयअन्तर्गत फोहरमैला व्यवस्थापन प्राविधिक सहयोग केन्द्रले नेपालका २६३ नगरपालिकामध्ये धनकुटा, इलाम र हेटौंडालाई सबैभन्दा सफा शहरका रुपमा नगदसहित पुरस्कृत गरेको हो ।