एमाले निर्वाचन आयोगले भन्यो : प्रेस चौतारीको अधिवेशन थाहा पाएनौं

News Summary

Generated by OK AI. Editorially reviewed.

नेकपा एमालेको निर्वाचन आयोगले प्रेस चौतारीको अधिवेशन बारे कुनै जानकारी नभएको जनाएको छ।
निर्वाचन आयोगका संयोजक विजय सुब्बाले चौतारीले अधिवेशन गर्दा आयोगसँग कुनै समन्वय नगरेको गुनासो गरेका छन्।
निर्वाचन आयोगको प्रतिवेदनमा प्रेस चौतारीको १०औं महाधिवेशनको कुनै औपचारिक सूचना आयोगमा नपुगेको उल्लेख छ।

२१ भदौ, काठमाडौं । नेकपा एमालेको निर्वाचन समितिले पार्टी निकट पत्रकारहरूको संगठन प्रेस चौतारीको अधिवेशन बारे कुनै जानकारी नभएको जनाएको छ ।

ललितपुरको गोदावरीमा जारी एमालेको दोस्रो विधान अधिवेशनमा प्रतिवेदन पेश गर्दै निर्वाचन समितिका संयोजक विजय सुब्बाले चौतारीले अधिवेशन गर्दा आयोगसँग कुनै समन्वय नगरेको गुनासो गरेका हुन् ।

सुब्बा नेतृत्वको समितिले अधिवेशनमा प्रस्तुत प्रतिवेदनमा पनि चौतारीको अधिवेशनबारे आयोगलाई कुनै औपचारिक जानकारी नभएको उल्लेख गरिएको छ ।

‘नेकपा एमालेको जनसंगठन प्रेस चौतारी नेपालको १०औं केन्द्रीय महाधिवेशन, २०८१ चैत १०-१२, विराटनगरमा सम्पन्न भएको भएता पनि आयोजक कमिटीले उक्त अधिवेशनको सहजीकरण वा निर्वाचन सम्पन्न गर्नका लागि कुनै पत्र केन्द्रीय निर्वाचन आयोगमा प्राप्त हुन नआएको,’ प्रतिवेदनमा उल्लेख छ ।

आयोगको प्रतिवेदनमा रिटर्नी फेडेरेसन नेपालको दोस्रो महाधिवेशनमा पनि निर्वाचनको मनोनयन कार्य नहुँदै अध्यक्ष मण्डलले कमिटीको नाम बन्दसत्रमा घोषणा गरेको उल्लेख छ ।

फेडेरेसनको अधिवेशन १५ र १६ चैत २०८१ मा काठमाडौंमा सम्पन्न भएको थियो ।