पूँजीबजार सुधार प्रतिवेदनलाई तत्काल कार्यान्वयन गर्न स्टक ब्रोकरको माग

२२ असोज, काठमाडौं । स्टक ब्रोकर एसोसिएसन अफ नेपाल (एसबान) ले पूँजीबजार सुधार कार्यदलले बुझाएको प्रतिवेदन तत्काल कार्यान्वयनमा लैजान माग गरेको छ ।
अर्थमन्त्री रामेश्वर खनालको निर्देशनपछि गठित कार्यदलले बुझाएको उक्त प्रतिवेदनको स्वागत गर्दै एसबानले कार्यान्वयनको माग गरेको हो ।

अर्थमन्त्री खनालनको निर्देशनका धितोपत्र बोर्डका कामु कार्यकारी निर्देशक रुपेश केसीको संयोजकत्वमा पूँजीबजार सुधारका लागि सुझाव दिन कार्यदलन गठन गरिएको थियो । उक्त कार्यदलले प्रतिवेदन बुझाएसँगै अर्थमन्त्री खनालले धितोपत्र बोर्ड, नेपाल राष्ट्र बैंक, नेपाल स्टक एक्सचेञ्ज (नेप्से) लगायत निकायलाई निर्देशन दिएका छन् ।

‘सुझाव कार्यदलले अहिलेको अवस्थामा पूँजी बजारको वृद्धि र विकासका लागि सेयर धितो कर्जाको लिमिट हटाउने, सेयर खरिदबिक्रीमा बैंक तथा वित्तीय संस्था माथि लगाइएको बन्देज हटाउने, नयाँ नयाँ औजार भित्र्याउने, नेप्सेको पुनर्संरचना सहित निजीकरण गर्नेलगायत दर्जनौं सुझाव दिएको छ त्यो एकदमै स्वागतयोग्य छ’ स्टक ब्रोकर एसोसिएसन अफ नेपालका अध्यक्ष सागर ढकालले भने उनले भने, ‘यो प्रतिवेदनले बुझाएको सुझावलाई राष्ट्र बैंक, धितोपत्र बोर्ड, नेप्सेलगायत सरोकारवाला निकायले कार्यान्वयनमा लैजानुपर्छ ।’

यसअघि कुनै पनि क्षेत्रको वृद्धि र विकासका लागि कार्यदल बनेर सुझाव पेश भएपनि कार्यान्यन नहुने गरेकाले यो सुझाव पनि त्यस्तै नहोस् भन्ने चाहना रहेको ढकालको भनाइ छ ।

‘अब सुझावलाई द्रुत गतिका साथ कार्यान्यनमा लैजाने हो भने नेपालको पुँजी बजारको भविष्य उज्वल हुनेछ’ ढकालले भने ।

यो पनि पढ्नुहोस

पूँजीबजार सुधार कार्यदलका सुझाव कार्यान्वयन गर्न सरकारको निर्देशन