महामन्त्रीद्वयले खड्कालाई भने : सभापतिले दिएको जिम्मेवारी अनुसार अधिवेशनको वातावरण बनाउनुस्

१४ कात्तिक, काठमाडौं। नेपाली कांग्रेसका महामन्त्रीहरूले कार्यवाहक सभापति पूर्णबहादुर खड्कालाई सभापति शेरबहादुर देउवाले दिएको जिम्मेवारीअनुरूप महाधिवेशनका लागि वातावरण बनाउन आग्रह गरेका छन्।

महामन्त्रीद्वय गनगकुमार थापा र विश्वप्रकाश शर्माले शुक्रबार भएको छलफलका क्रममा कार्यवाहक सभापति खड्कालाई महाधिवेशनको वातावरण बनाउन आग्रह गरेका हुन् ।

‘सभापतिले तपाईंलाई अधिवेशन गराउने जिम्मेवारी दिनु भएको हो। अधिवेशन गर्ने वातावरण बनाउनुस्,’ महामन्त्रीद्वयले कार्यवाहक सभापति खड्कासँग भनेका छन् ।

जवाफमा कार्यवाहक सभापति खड्काले आफू महाधिवेशनकै पक्षमा रहेको बताए । उनले पार्टीका नेताहरूसँग आफू छलफलमै रहेको पनि बताए । छलफलका क्रममा संस्थापन पक्षीय नेताहरू मंसिरमा महाधिवेशन गर्न सहमत नरहेका पनि बताए ।

‘म पनि महाधिवेशन गराउने पक्षमा छु । साथीहरूको कुरा सुनिरहेका छु,’ खड्काको भनाइ उद्धृत गर्दै एक महामन्त्रीले भने, ‘उहाँहरूले मानिरहनु भएको छैन । साथीहरूसँग तपाईंहरू पनि कुरा गर्नुस्।’

कार्यवाहक सभापति खड्कासँगको छलफल अघि थापा र शर्माले इतर समूहको नेतृत्व गरिरहेका नेता डा. शेखर कोइरालासँग बैठक गरेका थिए । उनीहरूलाई नेता कोइरालाले आगामी पुस १६ मा महाधिवेशन सम्पन्न गर्ने गरी कार्यतालिका ल्याउन र कार्यवाहक सभापति खड्कासँग त्यसबारे छलफल गर्न भनेका थिए।

इतर समूहले आगामी पुस १६ गते महाधिवेशन सम्पन्न गर्ने गरी कार्यतालिका बनाउन र शुक्रबार बस्ने केन्द्रीय कार्यसमिति बैठकमा पेस गर्न महामन्त्रीद्वय थापा र शर्मालाई जिम्मा दिएको छ।

यसअघि महामन्त्री थापाले बिहीबार पनि कार्यवाहक सभापति खड्कासँग महाधिवेशनको कार्यतालिकाबारे छलफल गरेका थिए । तर, दुई नेताबीच कुरो मिल्न सकेको थिएन।

कार्यतालिका पेस गर्ने अवस्था नदेखिएपछि महामन्त्री थापा बिहीबारको बैठकमा अनुपस्थित भएका थिए । स्रोतका अनुसार शुक्रबारको बैठकमा पनि कार्यतालिका पेस हुने सम्भावना न्यून छ।