‘पाँच पाण्डव’ मा जोडिए हरिवंश, दीपाश्री

काठमाडौं । हरिवंश आचार्य, सीताराम कट्टेल, जितु नेपाल, सागर लम्साल, दीपाश्री निरौला र रजनी गुरुङलाई शीर्ष भूमिकामा लिएर फिल्म ‘पाँच पाण्डव’ बन्ने भएको छ ।

यसअघि यो फिल्ममा दीपकराज गिरी पनि जोडिने चर्चा थियो । उनले आफू हुनसक्ने संकेत पनि गरेका थिए ।

मंगलबार बिहानको शुभसाइत पूजापछि मिडियालाई पठाइएको विवरणमा अभिनेता गिरीको नाम उल्लेख छैन ।

कमलादी गणेशस्थानमा फिल्मको शुभमुहूर्त पूजा गरिएको थियो । गणेशथानमा आज यो चलचित्रको शुभमुहूर्त गरिएको हो, जहाँ दीपाश्री निरौला पनि उपस्थित थिइन् ।

शीर्षकअनुसार फिल्म धार्मिक नभएर सामाजिक कथावस्तुमा आधारित रहेको निर्देशक वसन्त निरौलाले जनाएका छन् ।

फिल्मका कास्टिङको कार्य बाँकी नै रहेको जनाइएको छ । काली रानी फिल्मस्को प्रस्तुतिमा निर्माण हुने यो फिल्मको पटकथा र संवाद सुशील पौडेलले लेखेका हुन् ।

नवीन श्रेष्ठ प्रस्तुतकर्ता रहने फिल्मका निर्माता कालीरानी श्रेष्ठ हुन् ।

‘हाम्रो फिल्ममा कलाकारको राम्रो लाइनअप तपाईंहरूले देखि नै सक्नुभयो । हामी चलचित्र पनि दर्शकले रुचाउने बनाउने छौं’ निर्माता श्रेष्ठले भने ।

प्रस्तुतकर्ता श्रेष्ठले भने फिल्म ‘लाज शरणम’ निर्माण गरेका थिए । केही महिनाभित्र छायाकंन सुरु गरिने फिल्मको निर्माण नियन्त्रकमा दिलीप पन्त छन् ।

निर्देशक निरौलाले पछिल्लोपटक ‘ज्वाइँ साब’ निर्देशन गरेका थिए, जसको शीर्ष भूमिकामा जितुले अभिनय गरेका थिए । यसअघि उनले मेला, समर्पण, आवेग, राजनीति, विजयपथ निर्देशन गरेका थिए ।

यो पनि पढ्नुहोस

दशकपछि एउटै फिल्ममा दीपकराज, धुर्मुस र जितु

यो पनि पढ्नुहोस

धुर्मुस सुन्तलीलाई लिएर फिल्म ‘पाँच पाण्डव’ बन्ने