माओवादी केन्द्रलाई निष्क्रिय नगर्न माग गर्दै निर्वाचन आयोगमा निवेदन

News Summary

Generated by OK AI. Editorially reviewed.

सन्दीप पुनले नेकपा माओवादी केन्द्रलाई निष्क्रिय नगर्न निर्वाचन आयोगमा निवेदन दिएका छन्।
निवेदकले पार्टीको नाम, चुनाव चिह्न र मार्गदर्शक सिद्धान्त यथावत् राख्न आयोगलाई अनुरोध गरेका छन्।
उनले पार्टीको विधान विपरीत निर्णय गर्न नसकिने र आयोगलाई दबाबबाट प्रभावित नहुन चेतावनी दिएका छन्।

२१ कात्तिक, काठमाडौं । नेकपा माओवादी केन्द्रलाई निष्क्रिय नगर्न माग गर्दै निर्वाचन आयोगमा निवेदन परेको छ ।

सन्दीप पुनले शुक्रबार निर्वाचन आयोगमा यस्तो निवेदन दिएका हुन् ।

तर, कुन कानुनका आधारमा यस्तो निवेदन दिइएको हो र यसको प्रक्रिया के हुन्छ ? भन्नेबारे केही भनिएको छैन । आयोगले एउटा निवेदन आयो भन्ने रूपमा लिएर निवेदन ग्रहण गरिएको जनाएको छ ।

निवेदकले भने कुनै पार्टीमा विलय वा मर्ज गर्न चुनाव चिह्न र पार्टीको दार्शनिक मान्यता माओवाद परित्याग गर्न नसक्ने भएकोले नेपाल कम्युनिस्ट पार्टी माओवादी केन्द्र वैधानिक रूपले यथावत रहेको दाबी गरेका छन् ।

यस्तो दाबी गर्दै आयोगलाई उक्त पार्टीको नाम तथा चुनाव चिह्न यथावत् राख्न र फ्रिज नगर्न अनुरोध गरिएको छ ।

नेपाल कम्युनिस्ट पार्टी माओवादी केन्द्रको पार्टी कार्यसमिति महाधिवेशन आयोजक समितिमा रूपान्तरण भएको र उक्त आयोजक समिति विधान बमोजिम नयाँ कार्यसमिति गठन नहुन्जेल काम चलाउ आयोजक समिति मात्र भएकोले पार्टी जीवनमा उक्त समितिले दीर्घकालीन असर गर्ने कुनै पनि निर्णय गर्न नसक्ने पुनको दाबी छ ।

नेपाल कम्युनिस्ट पार्टी माओवादी केन्द्रको ऐतिहासिक जनयुद्ध र सोको आधारमा भएको सम्पूर्ण परिवर्तन हजारौं शहीद, घाइते तथा बेपत्ताहरूको योगदानको आधार सोही नाम झण्डा र चुनाव चिह्न तथा मार्गदर्शक सिद्धान्तबाट भएकोले उक्त पार्टीको विधान विपरीत कुनै निर्णय गर्न नसक्ने र दबाब प्रभावबाट निर्वाचन आयोग प्रभावित नहुन अनुरोध गरेका छन् ।

पार्टीको नाम, झण्डा, चुनाव चिह्न र मार्गदर्शक सिद्धान्त फ्रिज गरी चुनावमा भाग लिन वञ्चित गरिएमा निर्वाचनको वैधानिकतामा नै प्रश्न उठ्ने चेतावनी समेत दिइएको छ ।