इन्द्र-मै-दल अक्षयकोषबाट ५१ विद्यार्थीलाई छात्रवृत्ति वितरण

४ मंसिर, काठमाडौं । त्रिवेणी गाउँपालिका–२ नुवागाउँ रोल्पास्थित अरनिको माध्यमिक विद्यालयका कक्षा १ देखि १२ सम्म अध्ययनरत ५१ जना जेहेन्दार, विपन्न तथा वार्षिक परीक्षामा उत्कृष्ट अंक ल्याउने छात्रछात्रालाई छात्रवृत्ति प्रदान गरिएको छ ।

विद्यालयमा एक कार्यक्रमको आयोजना गरी अक्षेरुपी एक लाख रुपैयाँ छात्रवृत्ति प्रदान गरिएको हो । अक्षयकोषका दाताद्वय जिबराज बुढामगर, याशिका बाँठा मगर, अमृतबहादुर बुढामगर र दीपा बुढा मगरले आफ्ना स्वर्गीय बुवा/ससुराबुवा इन्द्र बुढा मगर, आमा/सासूआमा मैसरी बुढा मगर तथा काका/काकाससुरा दलबहादुर बुढा मगरको स्मृतिमा २०८० सालमा पाँच लाख रुपैयाँको इन्द्र-मै-दल अक्षयकोष विद्यालयमा स्थापना गरेका थिए । सोही कोषको प्राप्त ब्याजबाट विद्यार्थीलाई छात्रवृत्ति प्रदान गरिएको हो ।

कार्यक्रममा अक्षयकोष स्थापना कर्ताहरू जिबराज बुढा मगर र अमृतबहादुर बुढामगर, विद्यालयका संस्थापक प्रधानाध्यापक कुलानन्द गिरी, विद्यालय व्यवस्थापन समितिका अध्यक्ष कबिराज बुढा, प्रधानाध्यापक गणेशकुमार घर्ती मगर लगायतले छात्रवृत्ति वितरण गरेका थिए ।

विद्यालयका प्रधानाध्यापक गणेशले इन्द्र-मै-दल अक्षयकोषमार्फत यस वर्ष ५१ जना विद्यार्थीलाई छात्रवृत्ति प्रदान गरी विद्यालयको शैक्षिक उन्नति र विद्यार्थीको उज्ज्वल भविष्य निर्माणमा महत्वपूर्ण योगदान पुर्‍याएका दाताहरूप्रति आभार व्यक्त गरे ।

छात्रवृत्तिले विद्यार्थीहरूलाई प्रेरणा, हौसला र अवसर प्रदान गर्ने कार्य गरेको भन्दै उक्त कार्यका लागि दातापरिवारलाई विशेष धन्यवाद व्यक्त गरे ।