केदार संकेतको ‘अन्तिम साँझ’ लोकार्पण

News Summary

Generated by OK AI. Editorially reviewed.

यात्रा स्पर्श अभियान्ता केदार संकेतको कथासंग्रह 'अन्तिम साँझ' ललितपुरमा आयोजित समारोहमा लोकार्पण गरिएको छ।
नेपाल स्रष्टा समाजका अध्यक्ष वरिष्ठ साहित्यकार श्रीओम श्रेष्ठ 'रोदन'ले केदार संकेत फरक रहेको बताए।
साहित्यकार प्रगति राईले कथासंग्रहमा सुनुवार जातिको इतिहास र आम नेपाली समाजका वास्ताविक घटना समेटिएको बताइन्।

१४ पुस, काठमाडौं । यात्रा स्पर्श अभियान्ता तथा स्रष्टा केदार संकेतको नवौं कृति ‘अन्तिम साँझ’ लोकार्पण गरिएको छ । आइतबार ललितपुरमा आयोजित एक समारोहमा कथासंग्रह ‘अन्तिम साँझ’ सार्वजनिक गरिएको हो । नेपाल स्रष्टा समाजका अध्यक्ष वरिष्ठ साहित्यकार श्रीओम श्रेष्ठ ‘रोदन’, महाकाव्यकार खेमनाथ दाहाल, साहित्यकार प्रगति राई, संगीतकार तथा उपन्यासकार सन्तोष श्रेष्ठलगायतले एकसाथ पुस्तक लोकार्पण गरेका हुन् ।

प्रमुख अतिथि श्रीओम श्रेष्ठ रोदनले पुरस्कार, प्रतियोगिता र हल्लाखल्लाका भरमा स्थापित हुने रहर पाल्ने कतिपय सर्जकहरूको भीडमा केदार संकेत फरक रहेको बताए । प्रयोगवादी शैली, विषयवस्तुको विविधता, कथानकमा गम्भीरता जस्ता विशेषताले गर्दा अन्तिम साँझ जस्ता राम्रा कृतिका लागि हल्ला गरिरहनु नपर्ने धारणा उनले राखे ।

कथा सङ्ग्रहको समालोचनात्मक चिरफारमा साहित्यकार प्रगति राईले १२ वटा कथाहरू उस्तै उस्तै रहस्यमयी भएको, एक कथामा आफैं कथाको पात्र भए जस्तो लागेको अनुभव सुनाइन् । ‘यस कथा सङ्ग्रहमा सुनकोशीको कथा छ’ राईले भनिन्, ‘जुन कथाले सुनुवार जातिको इतिहास उत्खनन मात्रै गरेको छैन आम नेपाली समाजमा घटेको वास्ताविक घटना पनि पस्केको छ ।’ एक से एक कथा उत्कृष्ट, फरक र चाखलाग्दो रहेको उनले बताइन् ।

मिलाप पब्लिकेसनले प्रकाशन गरेको यस कथा सङ्ग्रहमा १५ वटा कथा रहेका छन् ।