पुराना नेपाली फिल्मलाई ‘डिजिटाइजेसन’ गरिने, आवेदन आह्वान

News Summary

Generated by OK AI. Editorially reviewed.

चलचित्र विकास बोर्डले एनालग प्रविधिमा बनेका स्वदेशी फिल्मलाई डिजिटल माध्यममा सुरक्षित राख्न डिजिटाइजेसन कार्यक्रम सञ्चालन गर्न आवेदन आह्वान गरेको छ।
डिजिटाइजेसनमा सहभागी हुन इच्छुक फिल्म निर्माता वा अधिकार प्राप्त व्यक्तिले सूचना प्रकाशित भएको मितिले २१ दिनभित्र आवेदन दिनुपर्ने बोर्डले जनाएको छ।
बोर्ड अध्यक्ष दिनेश डिसीले डिजिटाइजेसनले पुराना चलचित्रलाई संरक्षण गरी नयाँ पुस्तासम्म लैजान सहयोग पुग्ने बताए।

काठमाडौँ । चलचित्र विकास बोर्डले स्वदेशी फिल्मलाई ‘डिजिटाइजेसन’ गर्ने कार्यको लागि आवेदन आह्वान गरेको छ ।

बोर्डले सूचना प्रकाशित गर्दै एनालग प्रविधिमा निर्माण भएका स्वदेशी फिल्मलाई डिजिटल माध्यममा सुरक्षित राखी संरक्षण तथा प्रवद्र्धन गर्ने उद्देश्यले यो कार्यक्रम सञ्चालन गर्न लागेको जनाएको हो ।

यस कार्यमा सहभागी हुन इच्छुक फिल्म निर्माता वा अधिकार प्राप्त व्यक्तिले सूचना प्रकाशित भएको मितिले २१ दिनभित्र बोर्डले तोकेको ढाँचामा आवेदन पेश गर्नुपर्ने जनाइएको छ ।

डिजिटाइजेसन प्रक्रियामा सहभागिताका शर्त, आवेदन फाराम तथा आवश्यक विवरण बोर्डको वेबसाइटबाट लिन सकिने जनाइएको छ । बोर्ड अध्यक्ष दिनेश डिसीले स्वदेशी चलचित्र मुलुकको सांस्कृतिक र ऐतिहासिक धरोहर भएको उल्लेख गर्दै डिजिटाइजेसन अत्यावश्यक भएको बताए ।

उनले भने, ‘पुराना स्वदेशी चलचित्र केवल मनोरञ्जन मात्र होइनन्, ती हाम्रो समाज, समय र इतिहासका दस्तावेज हुन् । डिजिटाइजेसनमार्फत यस्ता चलचित्रको संरक्षण गर्नु आजको आवश्यकता हो । यस कार्यक्रमले हराउँदै गएका चलचित्रलाई सुरक्षित राख्दै नयाँ पुस्तासम्म लैजान सहयोग पुग्नेछ ।’

बोर्डले कार्यक्रममार्फत पुराना स्वदेशी चलचित्रको दीर्घकालीन संरक्षण, अध्ययन-अनुसन्धान तथा अन्तर्राष्ट्रिय स्तरमा समेत नेपाली चलचित्रको पहुँच विस्तार गर्ने लक्ष्य लिएको जनाएको छ ।