‘मिस लिटिल नेवाः ११४५’ को उपाधि ललितपुरकी सुरवीलाई

News Summary

Generated by OK AI. Editorially reviewed.

ललितपुरकी सुरवी बज्राचार्यले १५ औँ संस्करणको ‘मिस लिटिल नेवाः ११४५’ को उपाधि जितेकी छन्।
कृष्टिना महर्जन मुख्य उपविजेता र ‘मिस ट्यालेन्ट’ घोषित भएकी छन् भने रिपान्सी श्रेष्ठ सेकेन्ड रनर्सअप भएकी छन्।
प्रतियोगिताको उद्देश्य नेवार समुदायको भाषा, लिपि, कला र संस्कृति जोगाउन बालिकालाई अभिप्रेरित गर्नु रहेको छ।

काठमाडौं । १५ औँ संस्करणको ‘मिस लिटिल नेवाः ११४५’ को उपाधि ललितपुरकी सुरवी बज्राचार्यले जितेकी छन् । १९ जना प्रतिस्पर्धीलाई पछि पार्दै उनले उपाधि चुमिन् । जितसँगै उनले चम्किलो ताज, नगद २५ हजार रुपैयाँ र विभिन्न उपहार प्राप्त गरिन् ।

नेप्लिज फेसन होमको आयोजना र फाइट फर लाइफको सह-आयोजनामा सम्पन्न प्रतियोगितामा काठमाडौँ मैतीदेवीकी कृष्टिना महर्जन फस्ट रनर्सअप घोषित भइन् ।

कृष्टिनाले मुख्य उपविजेतासँगै ‘मिस ट्यालेन्ट’ को उपाधि समेत आफ्नो पोल्टामा पारिन् । त्यसै गरी, कुलेश्वरकी रिपान्सी श्रेष्ठ सेकेन्ड रनर्सअप बनिन् । उनीहरूले क्रमशः १५ हजार र १० हजार रुपैयाँ नगदसहित ताज र मेडल प्राप्त गरेका छन् ।

नेपाल पुलिस क्लबको सभाहलमा आयोजित फिनालेमा लायन्स क्लबका पास्ट डिस्ट्रिक्ट गभर्नर मनिश्रीरत्न बज्राचार्य, अधिवक्ता लक्ष्यमान महर्जन, शिक्षिता श्रेष्ठ, जिवेश्वरलाल श्रेष्ठ, राजु नापित र शान्तमान महर्जनको निर्णायक टोलीले विजेता छनोट गरेको थियो ।

प्रतियोगिताको उद्देश्य नेवार समुदायको भाषा, लिपि, कला र संस्कृति जोगाउन बालिकालाई अभिप्रेरित गर्नु रहेको नेप्लिज फेसन होमकी अध्यक्ष हेमा मानन्धरले बताइन् ।