हिपहप स्टार निकी मिनाजले ट्रम्पको प्रशंसा गर्दै भनिन् : म उहाँकी ‘नम्बर वान फ्यान’

हिपहप दुनियाँकी चर्चित गायिका निकी मिनाज हालै अमेरिकी राष्ट्रपति डोनल्ड ट्रम्पसँग एउटा सरकारी कार्यक्रममा देखिइन् ।

अमेरिकी अर्थ मन्त्रालयले भर्खरै जन्मिएका बच्चाहरूको लगानीका लागि ‘ट्रम्प एकाउन्ट्स’ नामको एउटा नयाँ कार्यक्रम सुरु गरेको छ । त्यही कार्यक्रमलाई साथ दिन निकी त्यहाँ पुगेकी थिइन् ।

कार्यक्रममा सेतो भुवादार कोटमा सजिएकी निकी निकै उत्साहित देखिन्थिन् । उनले ट्रम्पको हात समात्दै आफू उनको “नम्बर वान फ्यान’ भएको समेत बताइन् । उनले यो नयाँ सरकारी लगानी योजनाका लागि आफ्नो तर्फबाट १ लाख ५० हजार देखि ३ लाख डलर (करिब २ देखि ४ करोड नेपाली रुपैयाँ) सम्म सहयोग गर्ने प्रतिबद्धता पनि जनाइन् ।

संगीत क्षेत्रकी हस्ती र राजनीतिक नेतृत्वको यो तालमेलले अहिले सामाजिक सञ्जालमा निकै चर्चा पाएको छ ।

कार्यक्रममा बोल्दै त्रिनिडाड मूलकी यी चर्चित र्‍यापरले आफ्नो कुरा निकै प्रस्ट र निडर ढङ्गले राखिन् । उनले भनिन्, ‘म सायद राष्ट्रपतिको सबैभन्दा ठूलो (नम्बर वान) फ्यान हुँ, र यो कुरा कहिल्यै बदलिने छैन ।’

उनले आफ्नो निर्णयलाई लिएर हुन सक्ने आलोचनाको पनि कडा जवाफ दिइन् । उनले अगाडि भनिन्, ‘मानिसहरूले के भन्छन् वा कति घृणा गर्छन्, त्यसले मलाई अलिकति पनि फरक पार्दैन ।’

निकीले आफ्नो राजनीतिक अडानलाई लिएर भइरहेको आलोचनाको कडा शब्दमा प्रतिवाद गरिन् । उनले भनिन्, ‘मानिसहरूको घृणाले मलाई अझ बढी उनलाई (ट्रम्पलाई) साथ दिन हौसला दिन्छ । यसले हामी सबैलाई उहाँको पक्षमा उभिन प्रेरित गर्नेछ ।’

उनले अरूलाई पनि ट्रम्पविरुद्ध भइरहेको ‘बुलिङ’ वा अपमानको प्रतिकार गर्न आग्रह गर्दै भनिन्, ‘उनीहरूले उहाँलाई अपमान गरेर उम्किन पाउने छैनन् । यी झुटो प्रचारले केही काम गर्नेवाला छैनन् । उहाँको पछाडि ठूलो शक्ति छ र भगवानले उहाँको रक्षा गरिरहनुभएको छ ।’

राष्ट्रपति ट्रम्प पनि निकीको प्रशंसा गर्न पछि परेनन । उनले निकीलाई ‘इतिहासकै सबैभन्दा महान् महिला र्‍यापर’ को संज्ञा दिए । ठट्टाको शैलीमा ट्रम्पले निकीको लामो नङको प्रसंग निकाल्दै भने, ‘मलाई यी नङहरू मन परे, अब म पनि आफ्ना नङहरू यसरी नै पाल्नेछु ।’

यो समाचारमा अर्को एउटा निकै चर्चाको विषय थपिएको छ । कार्यक्रम सकिएपछि निकी मिनाजले सामाजिक सञ्जालमा एउटा फोटो सेयर गरिन्, जसमा उनले ‘ट्रम्प गोल्ड कार्ड’ समातेको देखिन्छ । त्रिनिडाडमा जन्मिएकी निकी ५ वर्षको उमेरमा अमेरिका आएकी थिइन् ।

कतिपयले उनको नागरिकताको विषयलाई लिएर प्रश्न उठाइरहेका बेला उनले यसरी ‘गोल्ड कार्ड’ देखाउनुलाई धेरैले अर्थपूर्ण रूपमा हेरेका छन् ।

निकीको यो नयाँ राजनीतिक अवतारले अहिले उनका फ्यानलाई दुई धारमा बाँडिदिएको छ । यी र्‍यापर, जो आफ्ना चर्चित गीतहरू ‘सुपर फ्रिकी गर्ल’, ‘एनाकोन्डा’, ‘स्टारसिप’ का लागि विश्वभर चिनिन्छिन्, उनी अहिले संगीतभन्दा बढी आफ्नो राजनीतिक झुकावका कारण चर्चामा छिन् ।

आफ्नो करियरमा १२ पटकसम्म ग्रामी अवार्डको मनोनयनमा परिसकेकी निकीको ट्रम्पप्रतिको यो मोह नयाँ भने होइन ।

डिसेम्बरमा ‘अमेरिकाफेस्ट’ सम्मेलनमा पुगेर उनले सबैलाई अचम्ममा पारेकी थिइन् । त्यहाँ उनले ट्रम्प र उनको प्रशासनको खुलेर तारिफ गरिन् । एक अन्तर्वार्तामा उनले ट्रम्पलाई ‘ह्यान्डसम र ड्यासिङ’ मात्र भनिनन्, ट्रम्पका समर्थकलाई त “कुल किड्स’ को संज्ञा समेत दिइन् । निकीको यो ’राइट विङ’ राजनीतिप्रतिको झुकावले गर्दा कतिपय फ्यान खुसी छन् भने कतिपयले उनको कडा आलोचना गरिरहेका छन् ।