आकर्षक व्यक्तित्व र आत्मविश्वास कायम राख्न अपनाउनै पर्ने ५ बानी

हामी सबैलाई लाग्छ कि– हाम्रो व्यक्तित्व भव्य देखियोस् र हामी अरूका लागि उदाहरणीय व्यक्ति बन्न सकौँ । काम गर्ने शैली, सक्रियता तथा सफलताबाट अरूले सिकुन र अनुसरण गरून् भन्ने इच्छा पक्कै सबैलाई हुन्छ । समूह तथा समुदायमा आफ्नो प्रभाव जमाउन र अरूलाई विश्वासमा लिन पनि व्यक्तित्व र आत्मविश्वासले ठूलो भूमिका खेल्छ ।

साना, सकारात्मक बानीहरू अपनाएर, हामी आफ्नो व्यक्तित्व बढाउन र आफ्नो जीवनमा सकारात्मक परिवर्तन ल्याउन सक्छौं ।

१.हरेक दिन केही नयाँ कुरा सिक्ने

जीवनमा हामीले नयाँ कुरा सिक्न कहिल्यै रोकिनु हुँदैन । हरेक दिन केही नयाँ सिकाइले हाम्रो दिमाग सक्रिय रहन्छ र सोच्ने क्षमतामा सुधार हुन्छ । हामी किताबहरू पढ्न सक्छौँ, आफ्नो रुचि भएको विषयमा अनलाइनतिर खोजेर पढ्न हेर्न सक्छौँ । कुनै ज्ञानवद्धक सिनेमा तथा डकुमेन्ट्रीहरू हेर्न सक्छौँ । आफ्नो काम तथा दैनिक जीवनमा आवश्यक केही जानकारीबारे सिक्न पनि सक्छौँ । नयाँ कुराहरू सिक्नाले हाम्रो आत्मविश्वास बढ्छ र जीवनमा अगाडि बढ्न प्रेरित गर्छ।

२.समयको उचित व्यवस्थापन गर्ने

हाम्रो मरणशील जीवनमा समयको महत्व निकै हुन्छ । हामीलाई लाग्न सक्छ हामीसँग जति पनि समय छ तर त्यसो होइन । समय व्यवस्थापन नगर्दा हाम्रो योजनाहरू लथालिंग भइरहेको हुन्छन् । यसले हाम्रो दैनिकी अस्तव्यस्त बनाउँछन् । यसले मानसिक तनाव तथा शारीरिक समस्याहरू समेत निम्त्याउछ । एकातिर नगरी नहुने कामका लागि समय पुगिरहेको हुँदैन भने अर्कातिर बिनाअर्थमा समय खेर गइरहेको पनि हुन सक्छ ।

समयको उचित व्यवस्थापन आत्म-विकासको एक महत्त्वपूर्ण भाग हो । आफ्नो दिनको अग्रिम योजना बनाउनाले तपाईंलाई समयमै कार्यहरू पूरा गर्न मद्दत गर्दछ, तनाव कम गर्छ । बिहान उठ्दा, आफ्ना महत्त्वपूर्ण कार्यहरूको सूची बनाउने र तिनीहरूलाई प्राथमिकतामा राख्दा समयको सही सदुपयोग हुन्छ । यसले उत्पादकता बढाउन र आफ्नो लक्ष्य प्राप्तिमा ठूलो सहयोग मिल्छ ।

३.सकारात्मक सोचको विकास गर्ने

सकारात्मक सोच जीवनलाई सहज बनाउने एक महत्वपूर्ण औजार हो भन्दा फरक पर्दैन । जीवनमा सबैले चुनौतीहरूको सामना गर्छन्, तर तिनीहरूप्रतिको उनीहरूको दृष्टिकोण फरक हुन्छ । नकारात्मक सोचले आत्मविश्वासलाई कमजोर बनाउँछ, जबकि सकारात्मक सोचले तपाईंलाई चुनौतीहरूको सामना गर्न सक्षम बनाउँछ । असफलताबाट हतोत्साही हुने भन्दा पनि त्यसबाट सिकेर अघि बढ्ने प्रयत्न गर्नुपर्छ।

४.स्वास्थ्यको विशेष ख्याल राख्ने

सक्रिय र स्मार्ट हुनका लागि राम्रो स्वास्थ्य आवश्यक छ । स्वस्थ शरीरले तपाईंको मानसिक स्वास्थ्यलाई बलियो बनाउनेछ । दैनिक कम्तीमा ३० मिनेट व्यायाम गर्ने, स्वस्थ आहार खाने र पर्याप्त निद्रा लिने गर्नुपर्छ । स्वस्थ शरीर र शान्त दिमागले आत्म-विश्वास बढाउँछ र सही निर्णय लिन सक्षम बनाउँछ ।

५.आत्म-विश्लेषण गर्ने

आफू कुन अवस्थमा छु, कहाँ उभिएको छु भनेर आफैंलाई समीक्षा गर्नुपर्छ । आफू कुन परिस्थितिमा छु, यसरी नै चल्नु ठीक हुन्छ कि सुधार आवश्यक छ ? मनमनै प्रश्न गर्नुपर्छ । हरेक दिन अथवा सातामा कुनै दिन आफूले गरिरहेका काम र व्यवहारबारे केही समय चिन्तन गर्नु समय आवश्यक छ ।

आफ्ना कमजोरी स्वीकार गरेर त्यसलाई सच्चाउँदै अघि बढ्नु आफ्नो व्यक्तिलाई परिष्कृत गर्दै लैजानु हो ।