कार्यसम्पादन सन्तोषजनक नभए कांग्रेसले समानुपातिक सांसद फिर्ता बोलाउन सक्ने

News Summary

Generated by OK AI. Editorially reviewed.

नेपाली कांग्रेसले समानुपातिक सांसदको भूमिका कमजोर देखिए फिर्ता बोलाउनसक्ने नयाँ प्रावधान लागू गरेको छ।
उपसभापति विश्वप्रकाश शर्माले विधानको दफा ४० अनुसार सांसदको जवाफदेहीपन र प्रभावकारिता सुनिश्चित गर्ने व्यवस्था रहेको जानकारी गराउनुभयो।
पार्टीले कार्यसम्पादन मूल्यांकन सन्तोषजनक नदेखिएमा सांसदलाई जुनसुकै बेला फिर्ता बोलाउन सक्ने व्यवस्था कार्यान्वयनका लागि निर्देशिका बनाउने तयारीमा छ।

१५ चैत, काठमाडौं । नेपाली कांग्रेसले समानुपातिक सांसदको भूमिका कमजोर देखिए फिर्ता गर्नसक्ने व्यवस्था गरेको छ ।

केन्द्रीय कार्यालय सानेपामा हिजोदेखि सुरु भएको ‘संसदीय सचेतना कार्यक्रम’मा उपसभापति विश्वप्रकाश शर्माले कार्यसम्पादन मुल्यांकनमा कमजोर देखिए पार्टीले जुनसुकै बेला फिर्ता बोलाउनसक्ने नयाँ प्रावधान बारे जानकारी गराएका हुन् ।

विशेष महाधिवशेनबाट पारित विधानमा राखिएको नयाँ व्यवस्था अनुसार संसदीय भूमिका कमजोर देखिए फिर्ता हुने बारेमा सांसदहरुलाई शर्माले जानकारी गराएका हुन् । शर्माले विधानको दफा ४० पढेर सांसदलाई सुनाएका थिए । उक्त दफामा पार्टीका तर्फबाट समानुपातिकतर्फ संघ र प्रदेशमा भएका सांसदको संसदीय जिम्मेवारीलाई प्रभावकारी र जवाफदेही बनाउने व्यवस्था छ ।

प्रचलित कानुन विपरीत काम गरेको ठहर भएमा, पार्टीको निर्देशन र मुल्यमान्यता विपरीत काम गरेमा, कार्यसम्पादन मूल्यांकन सन्तोषजनक नदेखिएमामा समानुपातिक सांसदलाई पार्टीले जुनसुकै बेला फिर्ता बोलाउन सक्ने उल्लेख छ ।

निर्वाचन आयोगले दर्ता र स्वीकृति प्रदान गरेको संशोधित उक्त व्यवस्था कार्यान्वयनका लागि पार्टीले सांसदहरु समेतको सुझाव समेटेर निर्देशिका बनाउने उपसभापति शर्माले जानकारी गराए ।