नियमित महाधिवेशन साझा भए कुरा मिल्छ, नत्र मिल्दैन : डा. प्रकाशशरण महत

१८ चैत, काठमाडौं । नेपाली कांग्रेसका नेता डा. प्रकाशशरण महतले विशेष महाधिवेशन पक्षधर पुराना सबै सक्किउन र आफ्नो बाटो खुलोस् भन्नेमा रहेको दाबी गरेका छन् । बुधबार निवर्तमान कार्यवाहक सभापति पूर्णबहादुर खड्का र डा. शेखर कोइराला पक्षधरले राखेको छलफल कार्यक्रममा बोल्दै नेता महतले यस्तो बताएका हुन् ।

‘विशेषवालाहरू पुराना सबै सक्किउन र हाम्रो बाटो खुलोस् भन्नेमा छन्,’ उनले भने, ‘आउने नियमित अधिवेशन सबैको साझा बनाएर गर्ने भए कुरा मिल्नसक्छ, नत्र मिल्दैन ।’

अहिलेको राजनीतिक परिस्थिति कांग्रेसका लागि राष्ट्रिय र अन्तर्राष्ट्रिय अवस्थामा प्रतिकूल भएको उनले बताए । सरकार र पार्टी सञ्चालनमा पनि केही कमजोरी भएको उनले औँल्याए ।

चुनावमा पनि कांग्रेसलाई ‘पहिलो हुन्छौँ’ भनेर झुक्याएको उनले टिप्पणी गरे ।