‘ग्रामीण चलचित्र महोत्सव’ सर्लाहीमा हुने

Listen News

0:00

0:30

🔊

News Summary

Generated by OK AI. Editorially reviewed.

‘नेपाल ग्रामीण चलचित्र महोत्सव’ को पाँचौँ संस्करण बैशाख १५ देखि १७ गतेसम्म सर्लाहीको चन्द्रनगर गाउँपालिकामा आयोजना हुने भएको छ।
महोत्सवमा नेपाली मौलिक ग्रामीण कथावस्तुमा आधारित ५० भन्दा बढी फिल्म आवेदन प्राप्त भएका छन्।
निर्णायक मण्डलले छनोट गरेका फिल्म प्रदर्शन गरिने र उत्कृष्टलाई अवार्ड प्रदान गरिनेछ।

काठमाडौं । ‘नेपाल ग्रामीण चलचित्र महोत्सव’ को पाँचौँ संस्करण आगामी बैशाख १५ देखि १७ गतेसम्म आयोजना हुने भएको छ । नेपाली मौलिक ग्रामीण कथावस्तुमा आधारित कथानक फिल्मलाई प्रोत्साहन गर्ने उद्देश्यले सञ्चालन हुँदै आएको महोत्सव यसपटक मधेश प्रदेशको सर्लाहीस्थित चन्द्रनगर गाउँपालिकामा हुनेछ ।

महोत्सव आयोजनाबारे चन्द्रनगर गाउँपालिकाका अध्यक्ष राजकुमार महतो र आयोजक संस्था सेलिब्रेटी नेपाल प्रतिष्ठानका अध्यक्ष रघुनाथ सापकोटाबीच सहमति भएको जनाइएको छ ।

“हिमाल, पहाड, तराई कोही छैन पराइ” भन्ने मूल नारालाई आत्मसात गर्दै विगतका संस्करण पहाडी क्षेत्रमा सफलतापूर्वक सम्पन्न गरिएको महोत्सव यसपटक तराईमा विस्तार गर्न लागिएको आयोजकले जनाएको छ ।

महोत्सवका लागि आह्वान गरिएका नेपाली मौलिक ग्रामीण कथावस्तुमा आधारित फिल्मतर्फ फिचर, सर्ट तथा विभिन्न भाषाभाषीका फिल्म गरी ५० भन्दा बढी आवेदन प्राप्त भएका छन् । तीमध्ये निर्णायक मण्डलबाट छनोट गरिएका फिल्म महोत्सवमा प्रदर्शन गरिनेछन् भने उत्कृष्टलाई विभिन्न विधामा अवार्ड प्रदान गरिनेछ ।

मनोनयन सूची आगामी साता घोषणा गरिने भएको छ । यसअघि गोरखाको लाप्राक, काभ्रेपलाञ्चोकको भकुण्डेबेसी, रामेछाप र रसुवामा महोत्सव सम्पन्न भएको छ ।